Հարավային Կովկասը ստվերում է լինելու. Կոնստանտին Տասիցը՝ Թրամփի արտաքին քաղաքականության առաջնահերթությունների մասին

Ռուս քաղաքագետ, Հարավային Կովկասի հարցերով փորձագետ Կոնստանտին Տասիցը Alpha News-ին մեկնաբանել է, թե ինչպես Դոնալդ Թրամփի հաղթանակը ԱՄՆ նախագահական ընտրություններում կազդի Ռուսաստանի և Հարավային Կովկասի նկատմամբ Վաշինգտոնի քաղաքականության վրա։

«Ինձ թվում է, որ վաղաժամ է խոսել այն մասին, թե ինչ քաղաքականություն է վարելու Թրամփի վարչակազմը և ինչպես դա կանդրադառնա Ռուսաստանի հետ հարաբերությունների կամ Հարավային Կովկասի իրավիճակի վրա։ Քանի որ քաղաքական գործիչները նախընտրական շրջանում հակված են ուռճացված խոստումներ տալ, այնքան էլ պարզ չէ, թե դրանք գործնականում ինչպես են իրականացվելու։ Այս թեման մանրամասն քննարկել հնարավոր կլինի միայն այն բանից հետո, երբ նա (Թրամփը) պաշտոնապես ստանձնի պաշտոնը և իր վարչակազմում առանցքային նշանակումներ անի։

Դա վերաբերում է Պետդեպարտամենտի ղեկավարին, ազգային անվտանգության հարցերով խորհրդականի պաշտոնին և այն անձանց, որոնք կոնկրետ կկառավարեն Ռուսաստանի հետ հարաբերությունները և փոխգործակցությունը Եվրասիայի, այդ թվում ՝ Հարավային Կովկասի հետ։

Կախված նրանից, թե ինչ մարդիկ են նշանակվելու այդ պաշտոններում, ինչ կոնկրետ առաջարկներ կհնչեցվեն ԱՄՆ-ի կողմից տարածաշրջանում առկա առանցքային խնդիրների վերաբերյալ, այդ ժամանակ արդեն կարելի է խոսել այն մասին, թե ինչպես կփոխվի իրավիճակը, եթե փոխվի», — հայտարարել է Տասիցը։

Ըստ Alpha News-ի զրուցակցի՝ առաջնահերթ կլուծվեն գլոբալ մակարդակի հարցերը, հետո միայն հայ-ադրբեջանական հակասությունները։

«Այնտեղ (Ուկրաինայում — խմբ.) 24 ժամում պատերազմն ավարտելու մասին խոսակցությունն, ընդհանուր առմամբ, պոպուլիստական հայտարարություն է։ Բարդ խնդիր է, այն չի կարող լուծվել այդքան կարճ ժամանակում։ Բացի այդ, մենք իրականում տեսանք, օրինակ, Թրամփի կոչը Լիբանանում Հայոց Կաթողիկոսին, եթե չեմ սխալվում, և որոշ մեսիջներ Հայաստանին։

Բայց, ամենայն հավանականությամբ, դա պայմանավորված է ընտրություններին ընդառաջ հայկական սփյուռքից ձայներ ներգրավելու փորձով։ Թե որքանով Ղարաբաղի և հայ-ադրբեջանական կարգավորման խնդիրը կլինի վարչակազմի ուշադրության կենտրոնում, պետք է տեսնել, թե որքանով դա արդիական կլինի Թրամփի համար այլ մեծ խնդիրների ֆոնին, ինչպիսին է Ուկրաինայի առճակատումը, Մերձավոր Արևելքը, Թայվանի խնդիրը: Բնականաբար, Հարավային Կովկասը որոշակիորեն ստվերում է լինելու»,- ամփոփել է Տասիցը։