Հարձակում՝ Երուսաղեմի հայկական համայնքի վրա

Ժամը 12:40-ին մի խումբ ահաբեկիչներ սև շորերով ու դիմակներով, թվով մոտ 30 հոգի, զինված փայտերով, արցունքաբեր նռնակներով ու այլ տեսակի միջոցներով հարձակում են գործել Երուսաղեմի հայկական թաղամասի «Կովերի պարտեզ» տարածքում գտնվող հայերի վրա՝ նրանց վնասելու, տարածքից դուրս հանելու և ահաբեկելու նպատակով:

israelahayer.com-ի հաղորդմամբ` ահաբեկիչները քարեր են սկսել շպրտել հայերի վրա:

«Հայ երիտասարդներն ու անակնկալի եկած հայ հոգևորականներն իսկական մարտի են բռնվել նրանց դեմ՝ համարժեք պատասխանելով ու պահելով տարածքը՝ մինչև 200 մետր հեռավորության վրա գտնվող հին քաղաքի ոստիկաններն ուշացումով կհայտնվեին դեպքի վայրում: Հարձակումը կասեցվել է:

2 հայ տարվել է ոստիկանություն։ Թե արդյոք հարձակվողները ձերբակալվել են ու պատիժ կկրեն, այս պահին հայտնի չէ»,- գրել է israelahayer.com-ը։

Երուսաղեմի պատրիարքարանից հայտնել են, որ ծանր վնասնավծքներ են ստացել Հայկական հոգևոր ակադեմիայի մի քանի քահանաներ, սարկավագներ, ուսանողներ, բնիկ հայեր։

«Սա այն հանցավոր պատասխանն է, որը մենք ստացել ենք Երուսաղեմի շրջանային դատարան «Կովերի պարտեզի» հարցով հայց ներկայացնելու համար, որը պաշտոնապես ստացել է դատարանը 24 ժամ առաջ։

Հայոց պատրիարքարանի գոյության սպառնալիքն այժմ ֆիզիկական իրականություն է։ Եպիսկոպոսները, քահանաները, սարկավագները և բնիկ հայերը տեղում պայքարում են իրենց կյանքի համար: Մենք կոչ ենք անում ամբողջ աշխարհի իշխանություններին և միջազգային լրատվամիջոցներին օգնել մեզ փրկել Հայկական թաղամասը բռնի կործանումից, որը տեղական աջակցություն է ստանում անանուն կազմակերպությունների կողմից»,- նշում են պատրիարքարանից։