Հայ մարզիկները մեդալներ են նվաճել աշխարհի Պարաաթլետիկայի 2023թ․ Գրան Պրի առաջնությունում
19 Մայիսի 2023, 18:30
Իտալիայի Ջեսոլո քաղաքում մայիսի 12-ից 14-ը անցկացվել է Աշխարհի Պարա աթլետիկայի 2023թ․ Գրան Պրի առաջնությունը: 57 մասնակից երկրների թվում էր նաև Հայաստանը իր 3 մարզիկներով և Հավաքական թիմի գլխավոր մարզիչով, գրում է ArmSport.am-ը:
Պատվիրակության ղեկավարն էր ՀԱՊԿ փոխնախագահ Գևորգ Հովհաննիսյանը: Պարա աթլետներ Սմբատ Կարապետյանը և Արման Սարգսյանը մասնակցեցին 100մ, 400մ և 800մ վազքատարածությունների մրցմանը։
Մրցումները նշված վազքատարածություններում իրականացվեցին ինչպես դասակարգմամբ այնպես էլ սերիաներով և խառը դասակարգման խմբերով։
Վերջնական արդյունքներով՝
Սմբատ Կարապետյանը T54 դասակարգման խմբում 100մ և 400մ վազքատարածություններում գրավեց 2-րդ հորիզոնականը, իսկ 800մ-ում 3-րդ հորիզոնականը։
Սերիական մրցելույթի հաշվարկով 100մ և 400մ վազքատարածություններում կրկին զբաղեցրեց 2-րդ հորիզոնականը իսկ 800մ-ում 5-րդ հորիզոնականը։
800մ խառը խմբայինում 21 մարզիկների հաշվարկում զբաղեցրեց 9-րդ հորիզոնականը։
Արման Սարգսյանը T53 դասակարգման խմբում 800մ վազքատարածությունում գրավեց 3-րդ հորիզոնականը, իսկ 100մ և 400մ վազքատարածություններում գրավեց 4-րդ հորիզոնականը։
Սերիական մրցելույթի հաշվարկով 100մ և 400մ վազքատարածություններում զբաղեցրեց 4-րդ և 5-րդ հորիզոնականները, իսկ 800մ-ում 7-րդ հորիզոնականը։
800մ խառը խմբայինում 21 մարզիկների հաշվարկում զբաղեցրեց 16-րդ հորիզոնականը։
Երկու մարզիկները գերազանց հանդես եկան և Հայաստանի պարա աթլետիկայի պատմության մեջ նախադեպը չունեցած արդյունքներ գրանցեցին։
Մեր երրորդ մարզիկ Սարգիս Մխիթարյանի դեբյուտն էր միջազգային արենայում։ Նա առաջնությունից առաջ անցավ մարզական դասակարգում և ստացավ գնդի հրում և սկավառակի նետում վարժությունում F57 դասիչը։
Սարգիսը գերազանց ելույթ ունեցավ բոլոր 6 մոտեցումներում և 16 մրցակիցների շարքում 9.59մ արդյունքով գրավեց 7-րդ հորիզոնականը։ Վնասվածքի պատճառով հնարավորություն չունեցավ առավելագույն արդյունքը ցուցադրելու, ինչպես նաև սկավառակի նետման մրցմանը մասնակցելու։
«Մարզիկների գրանցած հաջողությունները մարզչական լավ աշխատանքի արդյունք են։ Հավաքականի գլխավոր մարզիչ Սուսաննա Մարտիրոսյանի, ավագ մարզիչ Հովհաննես Գևորգյանի, մարզիկների անձնական մարզիչներ Արման Փիրոյանի և Արա Գալստյանի համատեղ և նվիրված աշխատանքի շնորհիվ կարողացանք ունենալ այս աննախադեպ արդյունքները:
Թիմը իր առջև դրված առաջադրանքը ամբողջությամբ կատարեց։ Շարունակական և հետևողական աշխատանքի շնորհիվ թիմը մոտ ապագայում ի վիճակի կլինի հաղթահարելու նաև միջազգային բարձրագույն առաջնությունների համար սահմանած նորմատիվները»,- ասվում է Հայաստանի Պարալիմպիկ կոմիտեի մամուլի քարտուղարության տարածած հաղորդագրության մեջ:
Հիմա եթերում
