Հայ-ռուսական համալսարանի ուսանողները զարմացրել են Մոսկվային. «Մոսկովյան տրանզիտ»

Մոսկվայի հայկական թատրոնը Սլավա Ստեփանյանի ղեկավարությամբ իր բեմում հյուրընկալել էր Ռուս-հայկական համալսարանի «ԲԵՄ» թատրոնի սաներին։ Երևանից երիտասարդ արտիստները ներկայացրել են «Մոսկովյան տրանզիտ» ներկայացումը, որը հիացրել է հանդիսատեսին։

Մոսկվայի հայկական թատրոնի ղեկավար Սլավա Ստեփանյանը Alpha News-ի հետ զրույցում կիսվել է իր տպավորություններով։ Նա նշել է, որ դերասանները կերտել են վառ ու հիշարժան կերպարներ, իսկ ներկայացման դինամիկան գրավել է առաջին իսկ րոպեներից, ինչի շնորհիվ մեկուկես ժամն աննկատ է անցել։

«Շատ հաճելի է տեսնել ՀՌՀ ուսանողներին մեր բեմում։ Նրանք պարզապես ուսանողներ չեն, այլ աներևակայելի տաղանդավոր դերասաններ: Որպես ուսանողական թատրոններ շատ տեսած մարդ, հաճելիորեն զարմացա։ Նրանց վարպետության մակարդակը զարմանալի է: Ինձ տպավորեց նաև այն, թե ինչքան լավ են ռուսերեն խոսում ուսանողները, եթե հաշվի առնենք, որ նրանցից շատերը երբեք չեն եղել Ռուսաստանում»,- ասել է նա։

Ստեփանյանն ընդգծել է, որ սա Հայաստանի և Ռուսաստանի մշակույթի փոխանակման հիանալի օրինակ է, որին Մոսկվայի հայկական թատրոնն ակտիվորեն աջակցում է։

«Մենք հանդես ենք գալիս որպես երկու երկրները կապող կամուրջ, և սա շատ կարևոր առաքելություն է մեզ համար։ Վստահ եմ, որ այս համագործակցությունը կզարգանա և կբերի շատ հրաշալի արդյունքներ»,- հավելել է նա։

Ռուս-հայկական համալսարանի «ԲԵՄ» թատրոնը հիմնադրվել է 22 տարի առաջ։ Այստեղ են հավաքվել ՀՌՀ տարբեր ֆակուլտետների ուսանողներ, իսկ այժմ նույնիսկ բուհի շրջանավարտները շարունակում են մասնակցել բեմադրությանը։ Սա խմբի առաջին այցն էր Մոսկվա, և նրա անդամները հաճելիորեն զարմացած էին մոսկովյան հանդիսատեսի ջերմ ընդունելությունից։ Օրվա ընթացքում նրանք կատարել են երկու ներկայացում, որոնք մնայուն տպավորություն են թողել թե՛ արտիստների, թե՛ հանդիսատեսի վրա։