Հայաստանում մեզ ձեռքերի վրա էին պահում, և դա անմոռանալի է. Իրինա Բեզրուկովա

Ռուս դերասանուհի Իրինա Բեզրուկովան Alpha News-ի հետ զրույցում կիսվել է Հայաստանի մասին իր տպավորություններով, որտեղ կրկին եղել է ֆիլմի նկարահանման հրապարակում: Այս անգամ այնտեղ ընթանում են Ղևոնդ և Սարիկ Անդրեասյան եղբայրների կինոընկերության արտադրության «Սիմոն» սերիալի նկարահանումները։

«Առաջին անգամը չէ, որ Հայաստանում եմ: Առաջին անգամ նկարահանող խմբի կազմում եկել եմ «Երկրաշարժ» ֆիլմի պրեմիերային և անմիջապես հայտնվել եմ շատ բարեհամբույր, հյուրընկալ, ջերմ մթնոլորտում, և դա ինձ ամենից շատ է տպավորել:

Երբ այս տարի ժամանեցի նկարահանման, ամեն ինչ կրկնվեց։ Հայեր՝ աներեւակայելի սրտացավ, հյուրընկալ, ուշադիր ժողովուրդ։ Զգացողություն կա, որ վերադարձել եմ հարազատ մարդկանց մոտ, թեև առաջին անգամ ես ծանոթանում: Հայաստանում նկարահանման գործընթացն այնքան էլ դժվար չի ընթանում, ինչպես սովորաբար լինում է, և մենք նույնիսկ ժամանակ ենք գտնում նկարահանումներից հետո գործընկերների հետ ճաշելու։ Ես ցանկանում եմ շարունակել նույն ոգով՝ պրոֆեսիոնալ, ուրախ, հումորով», — ասել է Բեզրուկովան։

Դերասանուհուն նկարահանումների ժամանակ այնքան է դուր եկել Գառնի անտիկ տաճարն ու Գեղարդ վանքը, որ նա կրկնել է իր ուղևորությունն այդ պատմական վայրեր իր միակ հանգստյան օրը:

«Նկարահանումները տեղի են ունեցել ամենագեղեցիկ վայրերում։ Մենք նկարահանվել ենք 4-րդ դարի տաճարի մոտ, որը գտնվում է կիրճի վերևում։ Նկարահանման գրաֆիկը բավական խիտ էր, բայց մեկ հանգստյան օր էր, և ես ևս մեկ անգամ ցանկացա գնալ Գառնու տաճար և Գեղարդի վանք: Ես շատ եմ ճամփորդել, շատ հնագույն շինություններ եմ տեսել, բայց Գեղարդն ինձ գերեց։ Հաջորդ անգամ ես պլանավորում եմ ժամանել սեպտեմբերին, այդ ժամանակ մենք նկարահանելու ենք սեպտեմբերյան բլոկը, նկարահանվելու է մի շարք, որտեղ ես գլխավոր հերոսուհին եմ», — նշել Է Իրինա Բեզրուկովան։