Հայաստանը ՀԱՊԿ-ից դուրս գալու դիմում չի ուղարկել. ՀԱՊԿ գլխավոր քարտուղար
28 Մարտի 2024, 11:22
Հայաստանը վերջին շրջանում չի մասնակցում ՀԱՊԿ քարտուղարության աշխատանքներին, սակայն քարտուղարությունը Երևանից պաշտոնական որևէ դիմում չի ստացել անդամակցությունը դադարեցնելու մասին։ Այս մասին «Ազգային պաշտպանություն» ամսագրին տված հարցազրույցում ասել է կազմակերպության գլխավոր քարտուղար Իմանգալի Տասմագամբետովը:
«Երևանն իսկապես վերջին շրջանում չի մասնակցում ՀԱՊԿ քարտուղարության աշխատանքներին։ Սա Հայաստանի որոշումն է այս փուլում, և մենք՝ որպես միջազգային կազմակերպություն, հարգում ենք ինքնիշխան պետության ցանկացած որոշում։ Այնուամենայնիվ, կազմակերպության գործունեությունը շարունակվում է ամբողջ ծավալով, բոլոր ընթացակարգերը պահպանվում են ՀԱՊԿ նորմատիվային բազային համապատասխան։ Ընդունվող և ընդունված որոշումների մասին քարտուղարությունը աշխատանքային ռեժիմով տեղեկացնում է Երևանում գործող համապատասխան կառույցներին: Հայաստանի Հանրապետության պաշտոնատար անձանց հիշյալ հայտարարությունների վերաբերյալ նշեմ, որ քարտուղարություն Երևանից որևէ պաշտոնական դիմում չի ստացվել ՀԱՊԿ անդամակցությունը դադարեցնելու մասին», — ասել է Թասմագամբետովը:
Նրա խոսքով՝ ՀԱՊԿ քարտուղարությունն աշխատում է կազմակերպությունում ընդունված կանոնակարգերին և ընթացակարգերին խիստ համապատասխան:
«Մենք, իհարկե, մեր վերլուծաբանների և նրանց հասանելի գործիքակազմի ուժերով վերլուծում ենք Հայաստանի շուրջ ստեղծված իրավիճակը և ՀԱՊԿ-ի հետ Հայաստանի փոխհարաբերությունները։ Չեմ թաքցնի, որոշակի իրադարձություններ և տրամադրություններ Հայաստանի էլիտաների մասով մտահոգիչ են։ Բայց մենք ակնկալում ենք Հայաստանի ղեկավարության քաղաքական սթափությունը և կազմակերպության նկատմամբ տարբեր սցենարների իրականացման հեռանկարների հավասարակշռված գնահատականը։ Ընդգծեմ, որ Հայաստանը մնում է մեր դաշնակիցը, առկա բոլոր պարտավորությունները մնում են ուժի մեջ», — ասել Է ՀԱՊԿ գլխավոր քարտուղարը։
ՀԱՊԿ-ին այժմ անդամակցում են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը:
Հիմա եթերում
