Հայաստանը պարտավորություններ ունի Արցախի անվտանգության ապահովման հարցում. ակցիա կառավարության դիմաց

«Մենք Արցախն ենք» եւ «Տնից հեռու երեխաները» նախաձեռնության անդամները երկու օր է՝ առեւանգված երեք արցախցի երիտասարդներին ազատելու պահանջով բողոքի ակցիա են իրականացնում Ռուսաստանի դեսպանատան դիմաց: Այսօր նրանք որոշեցին իրենց պահանջը ներկայացնել նաեւ Հայաստանի կառավարությանը:

Հայաստանում ՌԴ դեսպանության դիմաց ակցիա անելուց հետո արցախցիները երթով շարժվեցին կառավարության շենքի մոտ: Նրանց ձեռքին ՀՀ անձնագրեր կային:

Ելույթ ունենալով կառավարության շենքի դիմաց՝ արցախցիները հայտարարեցին, թե Հայաստանի իշխանությունը իրավունք չունի Արցախը ճանաչել Ադրբեջանի կազմում:

«Ադրբեջանն ավելացրել է իր ագրեսիան այդ հայտարարությունից հետո: Հայաստանի իշխանությունը մանդատ չունի Արցախը ճանաչելու Ադրբեջանի մաս: ՀՀ իշխանությունը պատասխանատվություն է կրում իր 120 000 քաղաքացիների համար»,- հայտարարեցին արցախցիները:

«Մենք Արցախն ենք» նախաձեռնության անդամ Լիանա Պետրոսյանը Alpha News-ի հետ զրույցում ընդգծեց՝ ինչպես Ռուսաստանը, այնպես էլ Հայաստանը հանդիսանում է 2020 թ. նոյեմբերի 9-ի եռակողմ հայտարարության կողմ, հետեւաբար, պետք է ապահովի այդ հայտարարության դրույթները:

«Հայաստանը փաստացի պարտավորություններ ունի Արցախի անվտանգության ապահովման հարցում: Մենք պահանջում ենք, որ Հայաստանը տեր կանգնի 2020 թ. նոյեմբերի 9-ի եռակողմ հայտարարությանը»,- ասաց Լիանան:

Հիշեցնենք՝ ադրբեջանցիները երեկ առեւանգել են Հակարիի կամրջով ռուս խաղաղապահների միջնորդությամբ Հայաստան տեղափոխվող արցախցի երեք երիտասարդի՝ Ալեն Սարգսյանին, Վահե Հովսեփյանին եւ Լեւոն Գրիգորյանին: