Հայազգի գործարար Սերգեյ Գալիցկինը՝ մոլորակի ամենահարուստ մարդկանց վարկանիշում

Bloomberg Billionaires Index-ը հրապարակել է մոլորակի ամենահարուստ մարդկանց վարկանշային աղյուսակը, որը հաշվարկվում է նրանց պատկանող ընկերության բաժնետոմսերի արժեքի հիման վրա։

Թարմացված աղյուսակում ռուսաստանաբնակ հայազգի գործարար Սերգեյ Գալիցկինը (Հարությունյան) բարձրացել է 10 կետով՝ զբաղեցնելով 467-րդ հորիզոնականը, մինչդեռ նոյեմբերի սկզբին 477-րդ հորիզոնականում էր։ Գործարարի կարողությունը գնահատվում է 6,71 մլրդ դոլար, տարեսկզբից այն ավելացել է 974 մլն դոլարով։

Գործարար Սերգեյ Գալիցկինը «Մագնիտ» մանրածախ ցանցի հիմնադիրն է, «Կրասնոդար» ֆուտբոլային ակումբի նախագահը և սեփականատերը։ Forbes-ը հրապարակել է 15 ռուսաստանցի գործարարների վարկանշային աղյուսակը, որոնք փոխել են Ռուսաստանի մասին պատկերացումները: Գալիցկին դրանում զբաղեցրել է 2-րդ տեղը «DST Global» ներդրումային հիմնադրամի հիմնադիր և «Mail.Ru Group»-ի նախկին համասեփականատեր Յուրի Միլներից հետո:

Տեղեկացնենք նաև, որ Bloomberg-ի ամենահարուստ մարդկանց թարմացված վարկանշային ցուցակում մոլորակի ամենահարուստ մարդը շարունակում է մնալ SpaceX և Tesla ընկերությունների հիմնադիր Իլոն Մասկը: Նրա կարողությունը գնահատվում է 319 մլրդ դոլար։
Երկրորդ տեղում Amazon առցանց խանութի հիմնադիր Ջեֆ Բեզոսն է: Ներկայում գործարարի կարողությունը գնահատվում է 235 մլրդ դոլար։ Երրորդը Meta ընկերության ղեկավար Մարկ Ցուկերբերգն է՝ 205 մլրդ դոլար կարողությամբ։