Հայտնի է՝ ում է ցանկանում Գարիկ Մարտիրոսյանը նկարահանել առաջին հայկական գիտաֆանտաստիկ ֆիլմում

Առաջին հայկական կատակերգական գիտաֆանտաստիկ ֆիլմում մենք ցանկանում ենք նկարահանել Անժելա Սարաֆյանին եւ Հրանտ Թոխատյանին, թեեւ նրանք դեռ չգիտեն այդ մասին։ Դա սուպեր դերասանական դուետ կլիներ։ Այս մասին NEWS.am STYLE-ին տված էքսկլյուզիվ հարցազրույցում հայտնել է շոումեն եւ հեռուստահաղորդավար Գարիկ Մարտիրոսյանը։

«Հիմա երկու նոր տեսահոլովակ ենք նկարահանել հումորային ոճով, որոնց վրա աշխատել եմ վերջին մեկ տարվա ընթացքում, եւ հուսով եմ, որ շուտով դրանք կթողարկվեն Youtube-ով։

Ինչ վերաբերում է կատակերգական գիտաֆանտաստիկ ֆիլմին, ապա դրա նկարահանումներին դեռւեւս շատ կա։ Այժմ դեռ սցենարն ենք գրում։ Հավանաբար դեռ մեկ տարի էլ կգրենք, իսկ մեկ տարի հետո, եթե ամեն ինչ լավ ընթանա, կսկսենք քասթինգը, պատրաստվելն ու նկարահանումները։ Դեռ շատ ժամանակ կա։

Շատ ենք ցանկանում, որ ֆիլմում նկարահանվի Անժելա Սարաֆյանը։ Բայց սա դեռ մեր ֆանտազիա է, երազանք: Ինքն Անժելան, դեռ չգիտի, որ մենք դա ցանկանում ենք։ Առաջին հերթին պետք է ավարտենք սցենարը, հետո կապ հաստատենք նրա հետ, ուղարկենք սցենարը, եթե նա կարդա ու հավանի, եւ նա համաձայնի, ուրեմն մեր երազանքը մի փոքր ավելի մոտ կլինի իրականությանը:

Կա նաեւ մի հրաշալի, իմ շատ սիրելի արտիստ Հրանտ Թոխատյանը։ Նա ամենուր ինձ դուր է գալիս։ Նույն իրավիճակն է, ինչ Անժելայի դեպքում: Եթե ​​Հրանտը համաձայնի, ի դեպ, ինքն էլ չգիտի, որ ուզում ենք նկարահանել իրեն, ապա կարծում եմ՝ սուպեր դերասանական դուետ կլինի։ Հիասքանչ կլինի»:

Ինքը՝ Գարիկը, ֆիլմում ոչ մի դերում հանդես չի գա։ «Ո՛չ, ո՛չ, ո՛չ… Ես իմ տեսահոլովակներում նկարահանվում եմ, քանի որ զվարճալի հումորային բովանդակություն է, իսկ ֆիլմը, թեեւ հումորային, բայց արդեն լուրջ աշխատանք է։ Ես պրոֆեսիոնալ դերասան չեմ եւ չեմ ցանկանում երբեւէ նկարահանվել ֆիլմերում։ Եթե ​​ես նկարահանվում եմ ֆիլմերում, ապա դա միայն որպես էպիզոդ, միկրոէպիզոդ։ Ինձ չի կարելի ֆիլմերում նկարահանվել»:

Նա նշել է, որ շատ նախագծեր ունի։ «Ես մեկ վայրկյան անգամ ժամանակ չունեմ։ Ամեն օր արթնանում եմ առավոտյան ժամը վեցին, եւ սա քիչ չէ… Հաջորդ տարի «Արմենիա» հեռուստաալիքով հնարավոր է նոր երաժշտական ​​նախագիծ լինի, բայց այս ամենը խոսակցությունների փուլում է, փորձում ենք հասկանալ՝ հնարավոր է դա անել, թե ոչ։ Այսպիսով, առայժմ ամեն ինչ ֆանտաստիկայի տիրույթում է»: