Ինչ է հայտնի Վրաստանի նախագահի թեկնածու Միխեիլ Կավելաշվիլիի մասին

Վրաստանի իշխող «Վրացական երազանք» կուսակցությունը որպես նախագահի թեկնածու ներկայացրել է Միխեիլ Կավելաշվիլիին: Նա գլխավորում է «Ժողովրդի ուժ» կուսակցությունը, որը հայտնի է իր հակաարևմտյան տրամադրություններով: Այս մասին հայտնում է«Սպուտնիկ Վրաստանը»:

Միխեիլ Կավելաշվիլին ծնվել է 1971 թվականի հուլիսի 22-ին Բոլնիսիում։ 1989 թվականին ընդունվել է Թբիլիսիի պետական համալսարանի տնտեսագիտական ֆակուլտետը։ Նա Վրաստանի ֆուտբոլի հավաքականի նախկին հարձակվող է։ 1988-1995 թվականներին հանդես է եկել Թբիլիսիի «Դինամո»-ում, ապա տեղափոխվել է Վլադիկավկազի «Ալանիա»։ Տարբեր տարիներին Կավելաշվիլին խաղացել է այնպիսի ֆուտբոլային ակումբներում, ինչպիսիք են՝ «Մանչեսթեր Սիթի»-ն, «Գրասհոֆեր»-ը, «Ցյուրիխ»-ը։

Միխեիլ Ղավելաշվիլին 2016-2020 թվականներին եղել է 9-րդ գումարման խորհրդարանի պատգամավոր «Վրացական երազանք-ժողովրդավարական Վրաստան» նախընտրական դաշինքից։ 2022 թվականի հունիսին Կավելաշվիլին մի քանի պատգամավորների հետ լքել է «Վրացական երազանքը», որպեսզի ազատ արտահայտի իր կարծիքն՝ անհարմար դրության մեջ չդնելով երկրի իշխող կուսակցությանը։ Նրանք հիմնել են «ժողովրդի ուժը» հասարակական կազմակերպությունը, այնուհետև համանուն կուսակցությունը, որը հայտնի է իր հակաարևմտյան տրամադրություններով։

«Ժողովրդի ուժը» բազմիցս մեղադրել է ԱՄՆ դեսպանատանը և նախկին դեսպան Քելլի Դեգնանին Վրաստանում «երկրորդ ճակատ» բացելու, «Վրացական երազանքը» տապալելու և «Միասնական ազգային շարժումը» իշխանության վերադարձնելու ցանկության, ինչպես նաև Վրաստանում առանձին ՀԿ-ների, ընդդիմության և ԶԼՄ-ների ֆինանսավորման մեջ: