Իրանի ԱԳՆ-ն մտահոգություն է հայտնել ցանկացած արտաքին միջամտության հնարավոր բացասական հետևանքների վերաբերյալ
09 Օգոստոսի 2025, 11:16
Իրանի Իսլամական Հանրապետության արտաքին գործերի նախարարությունը ուշադրությամբ հետևում է Հարավային Կովկասի տարածաշրջանում տեղի ունեցող զարգացումներին և ողջունում է Ադրբեջանի և Հայաստանի միջև խաղաղության համաձայնագրի ստորագրումը՝ որպես կայունության ճանապարհին նշանակալի քայլ:
Միևնույն ժամանակ, Թեհրանը մտահոգություն է հայտնում ցանկացած արտաքին միջամտության հնարավոր բացասական հետևանքների վերաբերյալ, հատկապես ընդհանուր սահմանների մոտ, որը կարող է վտանգել տարածաշրջանի անվտանգությունն ու հավասարակշռությունը:
Իրանը մշտական երկխոսություն է պահպանում հարևան երկրների՝ Հայաստանի և Ադրբեջանի հետ և ընդգծում, որ Կովկասում խաղաղությունն ու կայունությունը համապատասխանում են տարածաշրջանի բոլոր պետությունների շահերին: Խաղաղության համաձայնագրի տեքստի վերջնական համաձայնեցումը դիտվում է որպես տևական խաղաղության հասնելու կարևոր փուլ։
Թեհրանն ընդգծում է տարածաշրջանի բոլոր երկրների ազգային ինքնիշխանությունը և տարածքային ամբողջականությունը հարգելու անհրաժեշտությունը: Տրանսպորտային միջանցքների ստեղծման և կոմունիկացիոն ցանցերի ապաշրջափակման ցանկացած նախաձեռնություն պետք է իրականացվի բացառապես փոխադարձ շահերի հիման վրա և առանց արտաքին ճնշման։
Իրանի Իսլամական Հանրապետությունը նույնպես բաց է մնում Հայաստանի և Ադրբեջանի հետ կառուցողական համագործակցության համար՝ տարածաշրջանում խաղաղության, կայունության և տնտեսական զարգացման ամրապնդման նպատակով, այդ թվում՝ «3+3» տարածաշրջանային ձևաչափի շրջանակներում:
Հիմա եթերում
