Իրանի դեմ ցամաքային գրոհն անհնար է, Թրամփը նման խելահեղության չի գնա. Հոսեյնի
03 Մարտի 2026, 19:45
Ամերիկյան հանրությունը չի հանդուրժի մեծաթիվ զոհերով երկարատև ցամաքային ռազմական գործողություն։ Այս մասին Alpha News-ի հետ զրույցում նշել է իրանցի քաղաքական մեկնաբան Պույա Հոսեյնին՝ անդրադառնալով Թրամփի վերջին հայտարարությանը, թե Իրանում ցամաքային գործողության անհրաժեշտություն, ամենայն հավանականությամբ, չի լինի։
«Ցամաքային գործողությունները ենթադրում են զգալի զինվորական կորուստներ, ինչը Միացյալ Նահանգներում կարող է լուրջ դժգոհություն առաջացնել։ Այդ սցենարը քաղաքականապես չափազանց ծանր կլինի ցանկացած վարչակազմի համար»,- նշել է նա։
Նրա կարծիքով՝ Թրամփի հռետորաբանությունն ավելի շուտ հաշվարկված ազդակ է, որն ուղղված է Իրանի քաղաքական և ռազմական ղեկավարությանը։
«Նպատակն այն է, որ Իրանում որոշում կայացնողները վերանայեն իրենց հաշվարկները և չընկնեն մոլորության մեջ՝ կարծելով, թե Վաշինգտոնը պատրաստվում է երկարաժամկետ պատերազմի»,- ասել է Հոսեյնին։
Նրա համոզմամբ՝ եթե նույնիսկ ռազմական գործողություն տեղի ունենա, Թրամփը կփորձի սահմանափակ, կարճաժամկետ օպերացիայի մոդել կիրառել՝ արագ արդյունք արձանագրելու և ուժի ցուցադրությամբ քաղաքական դիվիդենտներ ստանալու համար։
«Խնդիրը ոչ թե երկարատև պատերազմն է, այլ արագ գործողությունն ու հաղթանակի տպավորության ձևավորումը»,- նշել է իրանցի փորձագետը։
Հիմա եթերում
