Իրանի դեմ սպառնալիքների կիրառման ցանկացած սցենար դատապարտված է ձախողման. Խայալ Մուազին
31 Մարտի 2025, 23:55
Իրանցի լրագրող Խայալ Մուազինը Alpha News-ին մեկնաբանել է լուրն այն մասին, որ ԱՄՆ նախագահ Դոնալդ Թրամփը սպառնացել է Իրանին «աննախադեպ ռմբակոծություններով»։
«Մեր հոգևոր առաջնորդը մի քանի անգամ հայտարարել է, որ Ամերիկայի հետ բանակցություններն արժանի չեն հարգանքի, այդ բանակցությունները ոչ մի արդյունքի չեն բերի։ Վաշինգտոնը շարունակում է հետևել հոգեբանական շանտաժի և ռազմավարական էսկալացիայի գծին։
Դոնալդ Թրամփի վերջին հայտարարությունը, որում նա սպառնում է Իրանին աննախադեպ ռմբակոծություններով, ոչ այլ ինչ է, քան տեղեկատվական, հոգեբանական պատերազմի տարր, որը նախատեսված է ոչ այնքան դիվանագիտական արդյունքի հասնելու, որքան վախեցնելու և վճռականության պատրանք ստեղծելու համար:
Ակնհայտ է, որ Եմենի դեմ պատերազմում ԱՄՆ-ի լիակատար ձախողումից հետո Սպիտակ տունն ուշադրությունը կենտրոնացնում է Իրանի վրա՝ սպառնալիքի օգնությամբ փորձելով փոխհատուցել ռազմավարական պարտությունը: Սակայն ամերիկյան կողմը հիանալի հասկանում է, որ Իրանի դեմ ցանկացած ռազմական արկածախնդրություն կհանգեցնի տարածաշրջանային աղետի և կվտանգի ոչ միայն ԱՄՆ-ի շահերը, այլև նրա դաշնակիցների կայունությունը:
Այժմ Վաշինգտոնն անցել է լայնածավալ հոգեբանական հարձակման փուլին, որի նպատակն է խարխլել Թեհրանի ռազմավարական զսպվածությունը։ Բայց պատմությունն ապացուցել է, որ Իրանը երբեք չի ենթարկվում ճնշումների, և ցանկացած սցենար, որտեղ Իրանի դեմ սպառնալիքներ են կիրառվում, դատապարտված է ձախողման»,- ասել է Մուազինը:
Հիմա եթերում
