Իրանի գերագույն առաջնորդի խորհրդականը խիստ քննադատել է Ադրբեջանին՝ Իսրայելի ռաբբիների գագաթնաժողով անցկացնելու համար
13 Սեպտեմբերի 2025, 16:55
Իրանի գերագույն առաջնորդի միջազգային հարցերով ավագ խորհրդական Ալի Աքբար Վելայաթին խիստ քննադատել է Ադրբեջանում իսրայելցի ռաբբիների գագաթնաժողով անցկացնելու մասին հաղորդագրությունները՝ այդ քայլն աննախադեպ և հակաիսլամական անվանելով, հաղորդում է Mehr-ը։
Վելայաթին զարմանք և ափսոսանք է հայտնել, միաժամանակ, հույս է հայտնել, որ այդ հաղորդագրությունները չեն համապատասխանում իրականությանը։
«Սա առաջին դեպքն է, երբ Ադրբեջանի կառավարությունը նման խախտում է կատարում, որը խաթարում է իսլամը և շիականության համաշխարհային հեղինակությունը»,- ասել է նա։
Ընդգծելով Ադրբեջանի «իսլամական ժառանգությունը»՝ Վելայաթին նշել է, որ ադրբեջանցի ժողովուրդը, որը գրեթե 1200 տարի մուսուլման է եղել, անպայման կմերժի նման արարքը։
Նա զգուշացրել է, որ գագաթնաժողովի նպատակը կարող է լինել այսպես կոչված «Աբրահամյան համաձայնագրերի» գործողության երկարաձգումը և, հնարավոր է, Ադրբեջանին այդ համաձայնագրում ներգրավելը։
Վելայաթին կասկածի տակ է դրել նաև Բաքվի համագործակցությունը Իսրայելի հետ՝ վկայակոչելով մուսուլմանական երկրների դեմ Իսրայելի թշնամական գործողությունները։
Հիմա եթերում
