Իսրայելի նպատակն է արգելակել Իրանի միջուկային ծրագիրը և դրդել նրան ԱՄՆ-ի հետ գործարքի գնալ. Գեորգի Ասատրյան
14 Հունիսի 2025, 15:25
Գիտաշխատող, համաշխարհային ռազմական տնտեսագիտության և ռազմավարական ինստիտուտի կրթական ծրագրերի կենտրոնի փոխտնօրեն, միջազգային հարցերով ռուսական խորհրդի փորձագետ Գեորգի Ասատրյանը Alpha News-ի հետ զրույցում մեկնաբանել է Իսրայելի հարձակումն Իրանի վրա և նշել, որ այդ հարվածի մեջ երկու բաղադրիչ կա՝ ռազմատեխնիկական՝ արգելակել միջուկային ծրագիրը, և դիվանագիտական՝ Թեհրանին դրդել ԱՄՆ-ի հետ գործարք կնքել:
«Ռազմատեխնիկական բաղադրիչ-ռազմավարությունն ուղղված է Իրանի միջուկային ծրագրում առաջընթացի մշտական արգելակմանը։ Իսկ դա կարելի է անել գիտնականների և բարձրագույն ռազմական հրամանատարության ոչնչացման, ինչպես նաև Իրանի միջուկային ծրագրին մասնակցող օբյեկտներին հարվածելու միջոցով։ Իրանը չի դադարեցնում Իրանի միջուկային ծրագիրը։ Ես շատ տեղեկություններ եմ ստանում այն մասին, որ սա Իրանի դեմ պատմության մեջ ամենախոշոր գործողությունն էր՝ տարբեր ռազմական տեխնիկայի, ամերիկյան արտադրության ինքնաթիռների ներգրավման, մասնակցության և այլնի առումով, բայց դա չկանգնեցրեց Իրանի միջուկային ծրագիրը։ Այսինքն՝ Իրանի միջուկային ծրագիրը կանգնեցնելու, ոչնչացնելու խնդիրն այդպես չի ստացվի լուծել։ Սպանվել են Իրանի ռազմական հրամանատարության որոշ ղեկավարներ, բայց արդեն ժամանակն է հարմարվել այդ փաստին։ Ի վերջո այդ ղեկավարներից յուրաքանչյուրն ունի տասնյակ տեղակալներ», — ասել է Ասատրյանը։
Ընդ որում, փորձագետը կարծում է, որ Իսրայելի հարվածն Իրանին կարող է դրդել Թեհրանին միջուկային զենք ստեղծել:
«Իրանը հասել է վճռականության այն մակարդակին, որ անհրաժեշտ է հասնել զսպող զենքի ստեղծմանը: Իսրայելը կփորձի կանգնեցնել այդ գործընթացը։ Բայց հետաքրքիր է մեկ այլ հարց՝ արդյոք Իսրայելին պետք է միջուկային ծրագրի կասեցում, թե՝ ռեժիմի տապալում։ Ամենայն հավանականությամբ, ռեժիմը տապալել էլ չի ստացվում։ Թեև Իրանում նկատվում է տնտեսական ճգնաժամ, մշտական պատժամիջոցների ռեժիմ, գնաճ, մարդիկ վերջին հարվածի պատճառով իրենց վրա զգացել են երկնքից եկող վտանգը, բայց ինչ-որ լուրջ նախադրյալներ, որոնք կհանգեցնեն ռեժիմի փոփոխության, ես դեռ չեմ տեսնում։ Ինձ թվում է, որ ընդհակառակը, արտաքին սպառնալիքը կարող է դառնալ հասարակության համախմբման պատճառ», — նշել է Ասատրյանը։
Փորձագետը նաև վստահ է, որ ԱՄՆ-ը տեղեկացված է եղել Իրանին հարված հասցնելու Իսրայելի ծրագրերի մասին:
Հիմա եթերում
