Կամերային երաժշտության տանը երգեհոնի տեղադրումից գրեթե 45 տարի անց այն կվերանորոգվի
29 Մայիսի 2023, 20:15
![](https://media.alphanews.am/wp-content/uploads/2023/05/29174215/349019984_236330169006731_8351350909355950896_n.thumb_-1.jpg)
Կամերային երաժշտության տանը երգեհոնի տեղադրումից գրեթե 45 տարի անց Կամերային երաժշտության ազգային կենտրոնի ղեկավարությունը նախաձեռնել է գործընթաց, որի արդյունքում երգեհոնը կվերանորոգվի և նոր շունչ կստանա։
Կամերային երաժշտության ազգային կենտրոնից տեղեկանում ենք, որ օրերս Նիդերլանդներից հատուկ հրավերով Հայաստան էր ժամանել երգեհոնն արտադրած «Ֆլենտրոպ» գործարանի մասնագետը, ով իրականացրել է գործիքի ամբողջական ուսումնասիրություն և ախտորոշում, որի հիման վրա կմշակվի վերանորոգման պլանը։
Համապատասխան ֆինանսական աջակցության առկայության դեպքում երգեհոնը կվերանորոգվի, և հայաստանյան հանդիսատեսը հնարավորություն կունենա վայելելու երգեհոնային երաժշտությունն ավելի հարուստ և մաքուր հնչողությամբ։
Կոմիտասի անվան կամերային երաժշտության տան հոլանդական «Ֆլենտրոպ» երգեհոնը տեղադրվել է 1979 թվականին և եզակի է իր տեսակի մեջ նախկին ԽՍՀՄ տարածքում:
Այն ստեղծված է 17-18 դարերի երգեհոնների օրինակների հիման վրա ու նախատեսված է հիմնականում բարոկ երաժշտություն կատարելու համար: Առաջին համերգին ելույթ է ունեցել ՀՀ ժողովրդական արտիստ Վահագն Ստամբոլցյանը: