Կոչ ենք անում զերծ մնալ ազգային մասնատման տանող նմանատիպ քայլերից. Արցախի թեմը՝ Վեհափառ հայրապետի մուտքը Սարդարապատ խոչընդոտելու մասին
29 Մայիսի 2024, 11:45
ՀԱՍԵ Արցախի թեմը դատապարտում է ոստիկանության՝ Գարեգին Բ-ի մուտքը Սարդարապատ խոչընդոտելու գործողությունները.
«Մայիսի 28-ին Գայանյանց տոնի առիթով մատուցված Ս. Պատարագի և Հանրապետական մաղթանքի ավարտից հետո Ամենայն Հայոց Կաթողիկոսը հոգևոր դասի ուղեկցությամբ այցելեց Սարդարապատի հուշահամալիր:
Հայոց Հայրապետը և հոգևոր դասը հանդիպեցին հուշահամալիրի տարածք մուտք գործելու արգելքի, ապա, մի քանի անգամ հաղթահարելով ոստիկանական ուժերի պատնեշները, հուշակոթողի առջև ծաղիկներ խոնարհեցին և աղոթք բարձրացրեցին առ Աստված՝ մայիսյան հերոսամարտերում նահատակված քաջարի հայորդիների հոգիների հանգստության համար:
Դատապարտում ենք ոստիկանական ուժերի նման վարքագիծը Հայոց Հայրապետի ու եկեղեցականների նկատմամբ և կոչ ենք անում զերծ մնալ ազգային մասնատման տանող նմանատիպ քայլերից:
Թող Տերը արթնություն ու զգոնություն տա մեր ազգին և անսասան պահի հայոց սահմանները»,- ասվում է Արցախի թեմի տարածած հաղորդագրության մեջ:
Հիմա եթերում
