Լավրովը սուտ է անվանել Երևանի հայտարարությունները, թե Ռուսաստանն Ադրբեջանին է տվել Արցախը
10 Սեպտեմբերի 2023, 15:30
ՌԴ արտգործնախարար Սերգեյ Լավրովն անդրադարձել է Հայաստանի պաշտոնյաների հայտարարություններին, թե Ռուսաստանը Արցախը հանձնել է Ադրբեջանին։
«Ինչ-որ գործիչ, կարծում եմ խորհրդարանի ղեկավարը, իրեն թույլ է տվել խոսել այն առումով, որ Ռուսաստանը Արցախը տվել է Ադրբեջանին: Ավելի ոչ կոռեկտ ու անազնիվ հայտարարություն դժվար է պատկերացնել։ Նա անդրադարձավ այն փաստին, որ Արցախը Ռուսաստանի կողմից տրվել է Ադրբեջանին, երբ Պուտինը, Փաշինյանը և Ալիևը 2020 թվականի նոյեմբերին ստորագրեցին առաջին եռակողմ պայմանավորվածությունները։ Դա բացարձակապես չի համապատասխանում իրականությանը»,- լրագրողներին ասել է Լավրովը:
Նա պարզաբանել է, որ Հայաստանի վարչապետը «ստորագրել է փաստաթուղթ, ըստ որի՝ այն ժամանակվա Արցախը գտնվում է Ադրբեջանի կազմում»։
«Այնտեղ ընդհանրապես ոչինչ չի ասում Արցախի կարգավիճակի մասին, և այն ժամանակ երեք առաջնորդներն էլ ելնում էին նրանից, որ այդ կարգավիճակի շուրջ դեռ բանակցություններ են լինելու։ Բայց երբ ավելի ուշ Պրահայում, որտեղ հրավիրված էին Ադրբեջանի նախագահն ու Հայաստանի վարչապետը, նրանք ստորագրեցին հայտարարություն, որում ասվում էր, որ ճանաչում են 1991 թվականի Ալմա-Աթայի հռչակագիրը, բոլոր հարցերը փակված են»,- հավելել է Լավրովը։
Հիմա եթերում
