Լոս Անջելեսում ամերիկահայերը մտադիր են գիշերել Ադրբեջանի հյուպատոսարանի մոտ եւ թույլ չտալ աշխատակիցների մուտքը շենք

Ամերիկահայերը մի քանի ժամ է՝ շրջափակել են Լոս Անջելեսում Ադրբեջանի հյուպատոսության շենքը, որտեղ բացի այդ երկրի հյուպատոսարանից, գործում է եւս 5 երկրի հյուպատոսարան, այդ թվում՝ Իսրայելինն ու Բուլղարիայինը: Ակցիայի մասնակիցները փակել են հյուպատոսարանների շենք տանող փողոցը: Նրանք մտադիր են գիշերել այնտեղ եւ առավոտյան թույլ չտալ հյուպատոսությունների աշխատակիցների մուտքը շենք:

Հայերը շենքի մուտքի դռների վրա փակցրել են Արցախի դրոշն ու «Արցախի հետ, Արցախի համար», «Հայերը ցեղասպանության վտանգի առջեւ են կանգնած՝ հանձին ադրբեջանական ռեժիմի», «Կանգնեցրե՛ք հայերի 2-րդ ցեղասպանությունը» գրությամբ պաստառներ:

Լոս Անջելեսում Alpha News-ի թղթակցի փոխանցմամբ՝ ոստիկանությունը փորձել է ճանապարհը բացել, բայց հայ ակտիվիստները համոզել են նրանց թույլ տալ շարունակել ակցիան: Նրանք կոչ են անում Լոս Անջելեսում ապրող հայերին՝ միանալ ի պաշտպանություն Արցախի ակցիային: Այնտեղ ներկա են նաև ամերիկյան ԶԼՄ-ների ներկայացուցիչներ:

Հիշեցնենք, որ մեկ շաբաթից ավելի է՝ ի պաշտպանություն Արցախի, ամերիկահայերը անհնազանդության ակցիաներ են անում: Նախ նրանք Բըրբանք քաղաքում, որտեղ տեղակայված է կոնգրեսական Ադամ Շիֆի գրասենյակը, ակցիա էին արել եւ հանդիպում պահանջել Շիֆի հետ: Հայ ակտիվիստները կոնգրեսականից պահանջում էին նաեւ գալ Հայաստան եւ տեղում ծանոթանալ իրավիճակին։ Մի քանի օր անց Ադամ Շիֆը համաձայնել էր ընդունել հայերին: Հանդիպմանը կոնգրեսականը տեղեկացրել է, որ շուտով Հայաստան է գալու ամերիկացի այլ կոնգրեսական: Կոնգրեսական Ադամ Շիֆի հանդիպումից հետո ամերիկահայերը իրենց բողոքի ակցիաները շարունակում են Լոս Անջելեսի արեւմուտքում գտնվող Ուիլշիր Բուլվարի եւ Գրենվիլ պողոտայի խաչմերուկում, որը կրում է «Արցախի Հանրապետության հրապարակ» անունը: Այս հրապարակին կից է նաեւ Ադրբեջանի հյուպատոսարանի շենքը: