Մանկապղծությունն արդեն իսկ պատժելի է ՀՀ քրեական օրենսգրքով՝ առանց Ստամբուլյան կոնվենցիայի. Հայկ Այվազյան

Մանկապղծության կադրերով տեսանյութի տարածման նպատակը ցույց տալն էր, որ Հայաստանում այդպիսի դեպքերը մասսայական են, այնքան շատ, որ կարիք կա լրացուցիչ օրենսդրական կարգավորման՝ Ստամբուլյան կոնվենցիայի վավերացման տեսքով:

Alpha News-ի հետ զրույցում նման կարծիք հայտնել «Լույս» տեղեկատվական-վերլուծական կենտրոնի ղեկավար Հայկ Այվազյանը՝ մեկնաբանելով օգոստոսի 18-ին համացանցում տարածված տեսանյութը, որում Գավառի բնակիչ Աննա Արևշատյանը բռնության է ենթարկում իր անչափահաս աղջիկներին:

Հայկ Այվազյանը համոզված է՝ տեսանյութը վաղուց էր նկարահանվել, ուղղակի, պատվիրատուները հիմա որոշեցին այն հրապարակել: Այվազյանը բացատրում է՝ հանցագործն իր արարքը չի կատարում տեսախցիկների առաջ, որպեսզի հետո դրա մասին իմանան բոլորը:

Հիշեցնենք, ձեռք բերված փաստերի հիման վրա 2023թ. օգոստոսի 19-ին, երեխաների մոր նկատմամբ հանրային քրեական հետապնդում է հարուցվել: Աննա Արևշատյանին մեղադրանք է ներկայացվել: Նա երկու ամսով կալանավորվել է և տեղափոխվել Աբովյան ՔԿՀ։ Ըստ մամուլի տեղեկությունների՝ կինը հարցաքննության ընթացքում ասել է, որ արարքը կատարել է գումարի դիմաց, այսինքն՝ նկարահանել է ինչ-որ մեկի համար, որը պատրաստ է եղել վճարել տեսանյութի համար:

Նշենք, որ տեսանյութի տարածումից հետո, Ֆեյսբուք սոցիալական ցանցում կրկին ակտիվացան Ստամբուլյան կոնվենցիան վավերացնելու անհրաժեշտության մասին խոսակցությունները: Եղան պնդումներ, որ կանանց և ընտանեկան բռնության կանխարգելումն ու պայքարը կարելի է ամբողջությամբ իրականացնել Հայաստանի կողմից Ստամբուլյան կոնվենցիան վավերացնելուց հետո միայն:

«Լույս» տեղեկատվական-վերլուծական կենտրոնի ղեկավար Հայկ Այվազյանի խոսքով, սակայն, այն արարքը, որը կար տեսանյութում, արդեն իսկ պատժելի է Հայաստանի Հանրապետության գործող քրեական օրենսգրքով: Այվազյանի դիտարկմամբ՝ եվրոպական այն երկրներում, որտեղ կոնվենցիան վավերացվել է՝ (Նիդեռլանդներ, Նորվեգիա, Ռումինիա և այլն), ընտանեկան բռնությունների թիվը միայն ավելացել է:

«Կոնվենցիան, որը մեզ փորձում են պարտադրել, Եվրոպայի ձախողված փորձն է»,- ընդգծում է Այվազյանը: Նրա խոսքով՝ կոնվենցիան նպատակ ունի թույլ տալ պետությանն ավելի շատ խառնվել յուրաքանչյուր մարդու ընտանիքի ներքին գործերին:

«Կոնվենցիան ենթադրում է, որ պետությունը կարող է խառնվել նաև սովորական ընտանեկան վեճերին եւս: Տնտեսական, հոգեբանական բռնություն կիրառելու դեպքում, արդեն իսկ, պետական մարմինները կամ իրենց կողմից արտոնված մասնավոր ընկերությունները կարող են գալ և խառնվել ընտանիքի ներքին գործերին»,- ասում է Այվազյանը:

Ըստ նրա՝ այդպիսի մասնավոր կազմակերպությունների համար Հայաստանի կողմից Ստամբուլյան կոնվենցիայի վավերացումը լավ առիթ է լինելու նաև պետբյուջեյից հավելյալ եկամուտներ ստանալու համար:

Հայկ Այվազյանի մեկնաբանմամբ, հայաստանյան ընտանիքներում ընտանեկան բռնության դեպքերը՝ հատկապես սեռական կտտանքների, քիչ են: Նրա համոզմամբ՝ Ստամբուլյան կոնվենցիայի հնարավոր վավերացումից հետո մեր երկրում պատժիչ իրավական մեխանիզմները դիտավորյալ ավելացվելու են, որպեսի կարողանան չնչին դեպքերին մեծ հնչեղություն ու արձագանք տալ:

«Նրանք գալու են մտնեն այդ տուն ոչ թե ընտանքը փրկելու, այլ այն կազմաքանդելու համար», -ասում է Հայկ Այվազյանը և հիշեցնում՝ Ստամբուլյան կոնվենցիան նույն իրավունքներն է տալու նաև ԼԳԲՏ համայնքի ներկայացուցիչներին: