Մարգար Սեդրակյան. Կոնյակագործության մեծ վարպետը

Alpha News-ը շարունակում է ներկայացնել «Ալֆա պերսոնա» շարքը:

Մարտի 31-ը կոնյակագործ, դեգուստատոր, Հայաստանում և Խորհրդային Միությունում սպիրտային խմիչքների արտադրության նոր, յուրօրինակ տեխնոլոգիաների հիմնադիրը Մարգար Սեդրակյանի ծննդյան օրն է։

Մարգար Սեդրակյանը ծնվել է 1907 թվականին Արևմտյան Հայաստանի Խառակոնիս գյուղում։ Նա վերապրել է Հայոց ցեղասպանությունը, որի ժամանակ մահացել են նրա ծնողները և ընտանիքի բազմաթիվ անդամներ։ Փոքր տարիքից հայտնվել է մանկատանը, որտեղ էլ ստացել է նախնական կրթությունը։

1930 թվականին ավարտել է Երևանի գյուղատնտեսական ինստիտուտն ու դարձել դիպլոմավորված մասնագետ։ 1935 թվականից Սեդրակյանը ԽՍՀՄ Համտեսի կենտրոնական հանձնաժողովի անդամ էր, 1940 թվականից՝ Երևանի կոնյակի գործարանի գլխավոր ինժեներ-տեխնոլոգը։

Շնորհիվ իր սեփական մոտեցման, Մարկար Սեդրակյանը զգալիորեն ընդլայնել է կոնյակի արտադրությունը Հայաստանում և խաղողի հատուկ սորտեր աճեցրել։ Նրա ղեկավարությամբ կոնյակի գործարանը վերելք է ապրել, իսկ նրա յուրահատուկ բաղադրատոմսը հայկական կոնյակին համաշխարհային ճանաչում է բերել՝ որպես արժանի մրցակից ֆրանսիական կոնյակին։

Սեդրակյանը դարձել է կոնյակի արտադրության հեղափոխական տեխնոլոգիայի հիմնադիրը ոչ միայն Հայաստանում, այլև Խորհրդային Միությունում։ Նրա նրբաճաշակ կոնյակները՝ «Տոնական», «Արարատ», «Նաիրի» և «Դվին», դարձել են իսկական գլուխգործոցներ և բազմիցս արժանացել ոսկե մեդալների համամիութենական և միջազգային հեղինակավոր մրցույթներում։ Մարգար Սեդրակյանն իր ողջ կյանքի ընթացքում ակտիվորեն զբաղվել է հայկական կոնյակի նոր տեսակների մշակմամբ, որոնք համաշխարհային հռչակ են բերել Հայաստանին:

Կոնյակի հանճարին շնորհվել է «Կոնյակի արտադրության բարձրագույն վարպետ» պատվավոր կոչումը։ 1971 թվականի ապրիլի 26-ին, ի նշան սննդի արդյունաբերության զարգացմանը մատուցած ծառայությունների, Սեդրակյանին շնորհվել է Սոցիալիստական աշխատանքի հերոսի կոչում՝ պարգևատրելով «Մուրճ ու մանգաղ» ոսկե մեդալով և Լենինի շքանշանով։ 1972 թվականին նրան շնորհվել է ֆրանսիական կոնյակի «Կամյու» տան բարձրագույն պարգև՝ «Համտեսի ասպետ» արծաթե մեծ մեդալ։

Մարգար Սեդրակյանը մահացել է 1973 թվականի հոկտեմբերի 1-ին Երևանում։