Միակ հաստատությունը, որ կկարողանա միավորել աշխարհի տարբեր ծայրերում գտնվող հայերին, եկեղեցին է․ Նորայր Պողոսյան

Բրբանք քաղաքի Սբ․ Ղևոնդյաց եկեղեցում Զատկի տոնի պատարագին մասնակցում էր մի քանի հազար մարդ, դրսում ևս բազմաթիվ մարդիկ կային։ Այս մասին Alpha News-ի ուղիղ եթերում ասաց Հայ Առաքելական եկեղեցու Արևմտյան թեմի առաջնորդարանի աշխատակից Նորայր Պողոսյանը։

«Վերջին 4-5 տարվա ընթացքում նկատում եմ, որ եկեղեցի այցելողների թիվը տարեցտարի ավելանում է։ Բայց պետք է նշել, որ այդ մարդկանց թիվն ավելանում է Հայաստանից եկողների, ինչպես նաև հայաշատ մյուս գաղթօջախներից եկողների հաշվին»,- հավելեց նա։

Նա ընդգծեց, որ մեր հայրենակիցները եկեղեցում իրենց հանգստությունն են գտնում, բացի այդ եկեղեցին այսօր նաև միավորող ուժ է։

«Այսօր այնպես է ստացվել, որ Արևմտյան թեմն իր տասնյակ եկեղեցիներով հանդերձ դարձել է հայության հոգևոր, կրթական, գիտական, մշակութային, գրական և բազմաթիվ այլ ոլորտների կենտրոնատեղին, ձգող հավաքատեղին։ Ուր գնան մարդիկ, եթե ոչ եկեղեցի։ Այն այսօր նաև միավորող ուժ է։ Եկեղեցում բոլոր արարողությունների ժամանակ մարդիկ մի կողմ են թողնում բոլոր տարաձայնությունները, շերտավորումները և դառնում են մի ամբողջություն։ Չկա մեկ այլ հաստատություն, որը կկարողանա այդկերպ միավորել աշխարհի տարբեր ծայրերում գտնվող հայերին»,- եզրափակել է Նորայր Պողոսյանը։