Նիդերլանդների Ալմելո քաղաքում հոգևորական խավը հրաժարվել է Սինանյանի հետ հանդիպումից. Աբրահամյան

Սփյուռքի գործերի գլխավոր հանձնակատար Զարեհ Սինանյանը փետրվարի 17-20-ը աշխատանքային այցով եղել է Նիդերլանդներում: Նրա հետ հրաժարվել են հանդիպել Հայ դատի կառույցների ներկայացուցիչները, Հայ մարմնակրթական ընդհանուր միությունը, Հայ օգնության միությունը և դրան ենթակա կառույցները:

Alpha News-ը թեմայի վերաբերյալ զրուցել է ՀՅԴ Նիդերլանդների Հայ դատի հանձնախմբի նախագահ Մասիս Աբրահամյանի հետ:

«Մենք հետևում ենք կուսակցության ընդհանուր գծին, և կուսակցությունը մերժում է Հայաստանի իշխանության ներկայացուցիչների հետ հանդիպումները: Մենք գնահատական ունենք այս իշխանության հանդեպ, և Սփյուռքի հանձնակատարը ևս համարվում է այս կառավարության մաս: Համարում ենք, որ այս իշխանությունն իր գործունեությամբ դավաճանել է հայ ժողովրդի ազգային շահերը, այդ իսկ պատճառով հրաժարվում ենք հանդիպումներից:

Նրանք իրենց հանդիպումներում միշտ անում են սուտ և սխալ հայտարարություններ, և նույնիսկ հակաճառելն իմաստ չունի: Մենք բոլորին կոչ ենք արել չհանդիպել նրա հետ: Ասել ենք, որ այս իշխանության ներկայացուցիչները որևէ ազգային դերակատարություն չունեն, բայց, այնուամենայնիվ, եղել են մարդիկ, որոնց հետ հանդիպում տեղի է ունեցել»,- ասել է Աբրահամյանը:

Մասնավորապես, ըստ նրա, Ալմելոում Սինանյանի հետ հանդիպել են միայն եկեղեցու վարչական աշխատողները։

«Հանդիպումներ եղել են Ալմելոում, Հաագայում, բայց Ալմելոում հոգևորական խավը հրաժարվել է մասնակցել հանդիպմանը, միայն հանդիպել են եկեղեցու վարչական աշխատողները: Որոշ քննադատական հարցեր են ուղղել Ցեղասպանության ժխտման հայտարարության մասին, Մասիս սարի, անցանկալի անձանց հետ կապված: Բայց որքանով տեղյակ եմ, նա խուսափողական պատասխաններ է տվել, հատկապես՝ Ցեղասպանության մասին հարցին: Սինանյանը գնացել է նաև Ցեղասպանության զոհերի հիշատակին նվիրված հուշարձանի մոտ: Այստեղ հարց է ծագում, թե ինչ տեսակի երեսպաշտ պետք է լինես, որ մի կողմից կասկածի տակ առնես Հայոց ցեղասպանությունը, մյուս կողմից գնաս և հարգանքի տուրք մատուցես»,- եզրափակել է Աբրահամյանը: