Նոր Ջուղայի ազգային կառույցները և ժողովուրդը դատապարտում են Փաշինյանի հայտարարությունները
24 Մայիսի 2023, 21:45
![](https://media.alphanews.am/wp-content/uploads/2023/05/24172420/c2b82bc7e20f374e8cabce4f38685ac2_L.jpg)
Նոր Ջուղայի ազգային կառույցներն ու ժողովուրդը հայտարարություն են տարածել՝ դատապարտելով Նիկոլ Փաշինյանի՝ Արցախի վերաբերյալ արած հայտարարությունները.
«Դատապարտում ենք Հայաստանի Հանրապետության դե-ֆակտո իշխանությունների կողմից Հայաստանի և Արցախի Հանրապետությունների տարածքային ամբողջականությունն ու սահմանները խաթարող որևէ հայտարարություն և գործողություն։
Ադրբեջանի ցանկություններին անվերապահ ենթարկվելու տրամաբանությաամբ Հայոց հայրենիքի մի մասը` Արցախի Հանրապետությունը և ՀՀ ինքնիշխան տարածքները Ադրբեջանին զիջելու այս քայլերը հակասում են հայ ժողովրդի կամքին, Հայաստանի ու հայության ազգային-պետական շահերին, ՀՀ Անկախության հռչակագրին, ՀՀ Սահմանադրությանն ու օրենսդրությանը և անխուսափելիորեն հանգեցնելու են հայկական պետականության կորստին:
ՀՀ իշխանություններից պահանջում ենք կատարելով հայրենիքի և համայն հայության իրավունքների պաշտպանը հանդիսանալու իրենց պարտավորությունը,
հրաժարվել այս աղետաբեր քաղաքականությունից և
առաջնորդվել՝ Հայաստանի ու Արցախի և հայ ժողովրդի ամբողջական շահերի ապահովման և արժանապատիվ խաղաղություն հաստատելու պատրաստակամության սկզբունքներով։
Սպահանի հայոց թեմի՝
թեմակալ առաջնորդ Տ. Սիփան եպս. Քէչէճեան
ազգային մարմիններ
Հայ Դատի յանձնախումբ
միութիւններ
23 մայիսի 2023