Փաշինյանը Հայաստանը վերածել է հակառուսական գործիքի ու հանել աճուրդի․ Ալեն Ղևոնդյան

Քաղաքագետ Ալեն Ղևոնդյանը Alpha News-ի եթերում վերլուծել է ԵՄ բարձրաստիճան պաշտոնյա Կայա Կալասի հայտարարությունն այն մասին, թե Հայաստանը Եվրոպայից օգնություն է խնդրել 2026թ. ընտրություններին ընդառաջ։

Ղևոնդյանի կարծիքով՝ իշխանությունները գիտակցում են, որ իրենց հեղինակությունը պատմական մինիմումի վրա է գտնվում, և գոյաբանական խնդիրը լուծելու համար անհրաժեշտ է փող և վարչական ռեսուրս։

«Գործող իշխանություններն ունեն գոյաբանական և ֆիզիկական անվտանգության խնդիր։ Այս իմաստով նրանք հասկանում են, որ մի օրվա մեջ կարող են զրկվել իշխանությունից, ինչը կարող է խիստ խնդրահարույց իրավիճակներ ստեղծվել»,- ասել է քաղաքագետը։

Նրա խոսքով՝ որևէ մեկը չի խոսում Հայաստանի շահի կամ անվտանգության մասին։ Ըստ նրա՝ Փաշինյանը Հայաստանը հանել է աճուրդի՝ վաճառելով այն Եվրոպային որպես հակառուսական գործիք։

Պատասխանելով հարցին՝ արդյոք այդ օգնությունը լինելո՞ւ է Փաշինյանի վերարտադրման համար, Ղևոնդյանն ասել է․ «Եվրամիությունն ասում է՝ մենք ձեզ վճարելու ենք, որպեսզի դուք վերարտադրվեք, դուք էլ պետք է ծառայություններ մատուցեք մեզ՝ ընդդեմ Ռուսաստանի և ընդդեմ Հարավային Կովկասում ռուսական ազդեցության»։

Նա զուգահեռներ է անցկացրել Հայաստանի, Ուկրաինայի և Մոլդովայի միջև՝ ԵՄ քաղաքականության համատեքստում և նշել․ «Այս ճանապարհը կարող է հանգեցնել պետականության կորստի կամ մասնատման։ Մեզ օգտագործելու են, հետո դեն են նետելու։ Դուք պատկերացնո՞ւմ եք դեն նետված պետությունների ճակատագիրը. դրանք կամ դադարում են գոյություն ունենալ, կամ մասնատվում են»։

Մանրամասները՝ տեսանյութում։