Պետական դավաճանություն կլինի Արցախը Ադրբեջանի մաս ճանաչելը. Աշոտ Դանիելյան
23 Մայիսի 2023, 00:06
![](https://media.alphanews.am/wp-content/uploads/2023/05/23000642/47031BE5-6FA3-4466-A16B-B570C1ADC6D4.jpg)
«Կապիտուլյանտը իրավունք չունի ստորագրել որևէ փաստաթղթի տակ, որտեղ Արցախը կճանաչի Ադրբեջանի մաս, դա կհակասի ՀՀ Սահմանադրությանը և 1992 թվականի Գերագույն խորհրդի ընդունած որոշմանը»,- հայտարարել է ԱՀ ԱԺ պատգամավոր Աշոտ Դանիելյանը Արցախի խորհրդարանում հրավիրված արտահերթ նիստին:
Դանիելյանի պնդմամբ` ՀՀ վարչապետի պաշտոնը զբաղեցնող կապիտուլյանտը աշխարհագրական որևէ վայրում` կլինի Պրահում, թե Բրյուսելում ամեն մի հանդիպմանը խորացնում է Արցախի հանձնման գործընթացը:
Ըստ նրա` հայ ժողովուրդն ունի բոլոր իրավունքները նրան հետ պահելու այդ քայլերից:
«ՀՀ որևէ իշխանություն չի ճանաչել Արցախը Ադրբեջանի մաս և նման տեսակետներ, մոտեցումներ չի ունեցել, ինչպես այս ազգակործան պատուհասը:
2018 թվականի հեղափոխութունից հետո ՀՀ իշխանությունները հայտարարում էին, որ Արցախը Հայաստան է և վերջ, ինչը բերեց բանակցությունների տապալման կամ փակուղի տարավ բանակցությունները, հետո հանգեցրեց պատերազմի:
Այսօր նժարին դրված է Արցախի ժողովրդի ֆիզիկական գոյության հարցը, և մեր ճակատագիրը որոշելու իրավունք որևէ մեկին չի տրվել և չի տրվելու: Եթե ազգակործան պատուհասը ստորագրեց որևէ փաստաթուղթ, որտեղ Արցախը ճանաչում է Ադրբեջանի մաս, ապա դա պետական դավաճանություն կլինի»,- ընդգծել է Աշոտ Դանիելյանը: