Պետք է դրվի Ադրբեջանին Եվրոպայի Խորհրդից հեռացնելու հարցը․ Ալեքսանդր Լապշին

«Քանի որ վճիռը երկու տարուց ավել չի կատարվում, ավելին՝ ադրբեջանական իշխանությունները բացահայտ հայտարարում են, որ իրենց չեն հետաքրքրում ո՛չ Եվրոպայի խորհրդի, ո՛չ եվրոպական դատարանի, ո՛չ էլ եվրոպական ատյանների ոչ մի որոշում, և այդ մասին խոսում են ուղիղ տեքստով, այսինքն՝ մենք դիմել ենք Եվրոպայի Խորհրդի Նախարարների կոմիտե՝ պահանջելով ճանաչել Ադրբեջանին որպես որոշման չարագործ չկատարող և համապատասխանաբար պատասխանատվության ենթարկել դրա համար», — Alpha News-ի հետ զրույցում հայտարարել է բլոգեր Ալեքսանդր Լապշինը Ստրասբուրգում Եվրոպայի խորհրդի անդամ երկրների պատվիրակությունների ներկայացուցիչների հետ խորհրդաժողովի արդյունքներով։

Նա հիշեցրել է, որ 2021 թվականի մայիսի 20-ին Մարդու իրավունքների Եվրոպական դատարանը Ադրբեջանի դեմ վճիռ է կայացրել նրա բողոքի վերաբերյալ։ Դատարանը Ադրբեջանին մեղավոր է ճանաչել 2011 թվականին Արցախ այցելելու և սպանության փորձ կատարելու համար:

«Մինչ օրս Ադրբեջանը չի կատարել դատարանի որոշումը։ Հիշեցնեմ, որ այնտեղ եղել է 30 հազար եվրո փոխհատուցում, բայց ավելի կարևոր է ոչ թե փոխհատուցումը, այլ նրանց պարտավորեցրել են հետաքննություն անցկացնել և գտնել մեղավորներին, թե ով է բանտում իմ դեմ մահափորձը կատարել։ Հիշեցնեմ, որ դրանք չորս դիմակավորված մարդասպաններ էին, ովքեր մտել են բանտախուց: Մինչև հիմա Ադրբեջանը չի կարողացել նրանց ձերբակալել և հարցաքննել, բայց մենք շատ լավ հասկանում ենք, թե ով է նրանց ուղարկել և ինչ նպատակով», — նշել է բլոգերը։

Խոսելով այն մասին, թե ինչ պատասխանատվություն է կրում դատարանի որոշումը չկատարելու համար, Լապշինը նշել է, որ առավելագույնը պետք է դրվի Ադրբեջանին Եվրոպայի Խորհրդից հեռացնելու հարցը: «Եվ ոչ միայն իմ անձնական գործով, այլ կան տասնյակ չկատարված որոշումներ Ադրբեջանի կողմից։ Ընդհանուր առմամբ, Ադրբեջանը եվրոպական դատարանի վճիռներն անտեսելու առաջատարներից մեկն է», — ընդգծել է նա։