Պուտինը և Փեզեշքիանը քննարկել են Հարավային Կովկասում տիրող իրավիճակը

ՌԴ նախագահ Վլադիմիր Պուտինը հեռախոսազրույց է ունեցել Իրանի նախագահ Մասուդ Փեզեշքիանի հետ։ Այս մասին հայտնում է Կրեմլի մամուլի ծառայությունը։

Զրույցի ընթացքում Պուտինը ԻԻՀ նախագահին տեղեկացրել է Անքորիջում տեղի ունեցած ռուս-ամերիկյան բարձր մակարդակի հանդիպման հիմնական արդյունքների մասին։ Փեզեշքիանն իր աջակցությունն է հայտնել ուկրաինական ճգնաժամի խաղաղ կարգավորմանն ուղղված դիվանագիտական ջանքերին։

Զրուցակիցներն անդրադարձել են նաև Հարավային Կովկասի տարածաշրջանում տեղի ունեցող իրադարձություններին և Իրանի միջուկային ծրագրի շուրջ ստեղծված իրավիճակին։ Քննարկել են նաև երկկողմ օրակարգային մի շարք հարցեր, այդ թվում՝ էներգետիկայի և տրանսպորտի ոլորտում։