Ալիևը հրապարակել է իր նախընտրական ծրագիրը

(Ալիևի նոր «քաղաքական նախագծի» կենտրոնում Հայաստանը լուծարելու գաղափարն է)

Քաղաքագետ Բենիամին Մաթևոսյանը Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է․

«Երբ անցած տարեվերջին հայտնի դարձավ, որ 2024 թվականի փետրվարին Ադրբեջանում արտահերթ ընտրություններ են անցկացվելու, տրամաբանությունն ու ողջախոհությունը հուշում էին, որ Իլհամ Ալիևը նոր ընտրությունների կգնա նոր քաղաքական նախագծով։

Ավելին, ադրբեջանական և թուրքական մամուլը, ինչպես նաև երկու երկրների փորձագիտական հանրությունը չէին թաքցնում, որ Հայաստանի դեմ պայքարի հաջորդ փուլը լինելու է այսպես կոչված «Արևմտյան Ադրբեջան» նախագծի իրականացումը, այն է՝ Հայաստանի տարածքում Բաքվի կողմից վերահսկվող քվազիպետության ստեղծումը: Ակնհայտ էր, որ Ալիևի քաղաքական նախագծի հիմքը, որով նա կգնա արտահերթ ընտրությունների 2024 թվականին, լինելու է «Արևմտյան Ադրբեջան» հայեցակարգը, որը ենթադրում է Հայաստանի Հանրապետության կազմալուծում։

Այնուամենայնիվ, հաշվի առնելով այն հանգամանքը, որ հայկական հասարակության զգալի մասը և հատկապես նրա այն հատվածը, որը կոչվում է «փորձագիտական համայնք», հիմնովին հավատարիմ է իրականության ընկալման նատուրալիստական մոտեցումներին, անհրաժեշտ էր, որ այս նախագծի հիմնական ուրվագծերը ներկայացներ անձամբ Իլհամ Ալիևը, որպեսզի գոնե տեսական հնարավորություն լինի գնահատելու Հայաստանի գլխին կախված սպառնալիքի աստիճանը, ու Ադրբեջանի նախագահը դա արեց 2024 թվականի առաջին օրերին։

Նախօրեին Ադրբեջանի նախագահը զրուցել է տեղական լրատվամիջոցների ներկայացուցիչների հետ և մի շարք շատ կարևոր հայտարարություններ արել պաշտոնական Բաքվի և Երևանի հարաբերությունների վերաբերյալ։

Ալիևի խոսքերից հայտնի դարձավ, որ Ադրբեջանը չի պատրաստվում ընդունել Նիկոլ Փաշինյանի առաջարկը և զորքերը դուրս բերել 2020-2022 թվականներին օկուպացված հայկական տարածքներից, որ Ադրբեջանում հայկական Ջերմուկ քաղաքը համարվում է իրենց «պատմական տարածքը», և ավելի քան ակնհայտ դարձավ, որ «Հայաստանի հետ սահմանները բացելու» պատրաստվելու փոխարեն Բաքուն և նրա թիկունքում կանգնած Անկարան, նոր ագրեսիա են նախապատրաստում Հայաստանի դեմ։

Հիմա դիտարկենք Ալիևի վերջին հայտարարությունների ամենակարևոր հատվածը, մի հատված, որը հիմնովին ապահովեց Փաշինյանի քաղաքական սնանկի կարգավիճակը։

Իլհամ Ալիևը հայտարարել է. «Ադրբեջանցիներն Ադրբեջանից Ադրբեջան մեկնելիս չպետք է անցնեն սահմանային կամ մաքսային հսկողություն: Մեղրիով երթուղի կա, սովետի ժամանակ կար՝ երկաթգիծն էր աշխատում, ճանապարհը կառուցվում էր։ Այս երթուղին պետք է ապահովվի։ Եթե Հայաստանը չկատարի մեր պայմանը, ապա մենք ոչ մի կետում չենք պատրաստվում բացել սահմանը Հայաստանի հետ, և նրանք հավերժ կմնան տարածաշրջանում փակուղի»։

Ալիևի հայտարարությունը նշանակում է, որ նույնիսկ Արցախը ստանալուց հետո Ադրբեջանը չի հրաժարվել Հայաստանի հետ կապված իր որևէ պահանջից։

Բացի այդ, Թուրքիան միշտ հայտարարել է, որ Հայաստանի հետ հարաբերությունների «կարգավորումը» կախված է Բաքվի և Երևանի հարաբերություններից, և քանի դեռ Ադրբեջանը «բավարարված չէ», Անկարան չի պատրաստվում բացել Հայաստանի հետ սահմանը։ Ալիևի հայտարարությունն իր հերթին նշանակում է, որ «Բաքուն գոհ չէ, բավարարված չէ», ինչը նշանակում է, որ Հայաստանի Հանրապետության և Թուրքիայի Հանրապետության միջև սահմանը բաց չի լինելու։

Ալիևի հայտարարությունները նաև նշանակում են, որ երկրների միջև «խաղաղության պայմանագիր» չի լինելու։

Սա իր հերթին նշանակում է, որ Փաշինյանը տոտալ քաղաքական բանկրոտ է։ Նրա բոլոր թեզերը ոչնչացված են։ Նա նույնիսկ իր ընտրողներին տալու բան չունի։ Տարին նոր է սկսվել, բայց արդեն հիմա վստահաբար կարող ենք ասել, որ սա Փաշինյանի անձնական ձախողման տարին է։

Եթե խոսենք քաղաքական կարգախոսների լեզվով, ապա 2024 թվականի առաջին օրերն ապացուցեցին, որ «Ապագա ՉԿԱ»: Հանձնելով Արցախը, «անկլավները» ճանաչելով Ադրբեջանի մաս, հրաժարվելով Բաքվի հետ բանակցություններում արծարծել Արցախի հարցը և արցախցիների իրավունքների հարցը՝ Փաշինյանը ոչ միայն չլուծեց Հայաստանի խնդիրները Ադրբեջանի հետ, այլ պարզապես թույլ տվեց ադրբեջանական զինտեխնիկան, ադրբեջանական բանակի անձնակազմը և Ադրբեջանի ռազմական ենթակառուցվածքը կանգնել Հայաստանի հետ սահմանին, իսկ որոշ դեպքերում՝ անպատիժ խախտել Հայաստանի Հանրապետության սահմանը։

Արցախի կորստի պատճառով ադրբեջանական զինտեխնիկան և զորքերը գտնվում են Երևանից 2 ժամ հեռավորության վրա (եթե Ջերմուկից ես գալիս, և 1 ժամ հեռավորության վրա՝ եթե գալիս ես Երասխից), Նիկոլ Փաշինյանն է այս ամենը բերել մեր սահմանին։ Մտածեք այս ամենի մասին…»: