«Էթնիկ կոդ». Մեխակ Գալստյան

Ի՞նչն է օգնում մեզ՝ հայերիս, որտեղ էլ որ ապրենք, սիրված և պահանջված լինել, հասնել հաջողության, պահպանել ազգային ու ընտանեկան արժեքները։

Alpha News-ի «Էթնիկ կոդի» հերթական թողարկման հերոսը «The Бык» ռեստորանային ցանցի հիմնադիր Մեխակ Գալստյանն է։

Նա պատմել է, որ այսօր «The Бык»-ն ունի քսանից ավելի ռեստորան, որից 18-ը գտնվում են Մոսկվայում, Սանկտ Պետերբուրգում, Կալուգայում և Տուլայում։ Ընդհանուր առմամբ, ցանցն ունի ավելի քան 2000 աշխատակից։ Գալստյանի խոսքով՝ ի սկզբանե նախատեսված է եղել, որ դա լինի գլոբալ նախագիծ:

«Մտածեցի՝ ինչո՞ւ չբացել ռեստորան, որտեղ մարդիկ պարզապես կհանգստանան և չեն մտածի գնի մասին։ Ես ուսումնասիրեցի մեր և արտասահմանյան փորձը և եկա այն եզրակացության, որ պետք է հիմնել ֆիքսված գներով ռեստորան։

Ինձ հաճախ են տալիս այն հարցը, թե ինչպես կարելի է հավատարիմ մնալ այս գներին։ Դրան կարելի է հասնել միայն լավ պայմանավորվածությունների և մեծ ծավալների պայմանագրերի միջոցով։ Այսօր մեր ցանցում ամսական սպառվում է մոտ 200 տոննա սթեյք։ Պատկերացնու՞մ եք մասշտաբները»,- ընդգծել է Գալստյանը։

Նրա խոսքով՝ իրենց մոտ գոյություն ունի «հարյուր օրվա» կանոնը:

«Եթե նոր հայեցակարգ եք ներկայացնում, և այն լավ է աշխատում, պետք է հարյուր օր սպասել: Եթե հարյուր օր «գոյատևում է», այսինքն՝ անկում չի ապրում, հետաքրքրության կորուստ չի լինում, ուրեմն հայեցակարգը կայացել է։ Ուստի մենք հաղթահարեցինք «հարյուր օրվա» կանոնը և որոշեցինք, որ եթե նույն ոգևորությունը լինի, ուրեմն առաջ կգնանք։

Եվ իսկապես, հերթերը եղել են ու կան։ Եվ մենք ռիսկի դիմեցինք և երկրորդ ռեստորան բացեցինք Պուշկինի հրապարակում, հենց կենտրոնում։ Որոշեցինք բացել ռեստորան, որը պահանջված կլինի բնակչության շատ լայն շերտի կողմից»,- ասել է «The Бык» ռեստորանների ցանցի հիմնադիրը:

Մանրամասները՝ տեսանյութում: