Գնաճի արագացումը՝ հարկային խստացումների հետևա՞նք
18 Ապրիլի 2025, 18:10
Պաշտոնական վիճակագրությամբ այս տարվա մարտին սպառողական գների ինդեքսը (ՍԳԻ) ավելացել է 3,3 %-ով: Նշենք, որ փետրվարին ցուցանիշը 2,5 % էր, հունվարին՝ 1,7%: Այսինքն` գնաճն արագացել է:
Ընդ որում, ինդեքսի կուտակային ցուցանիշի՝ 3.3 %-ի կառուցվածքի ուսումնասիրությունը վեր է հանում մի պարզ պատկեր, որ առանձին ապրանքախմբերում թանկացումներն ավելի շատ են: Օրինակ, սննդամթերքի և ալկոհոլային խմիչքների գներն անցյալ տարվա մարտի համեմատ ավելացել են 5.4% -ով, ծխախոտինը՝ 5,1%-ով, ծառայություններն, ինչպես օրինակ, առողջապահությունը, տրանսպորտը և կրթությունը թանկացել են համապատասխանաբար՝ 3,5%-ով, 3,7%-ով և 7,8%-ով: Նշվածների գները բարձրացել են նաև նախորդ ամսվա համեմատ:
Պատկերը մտահոգիչ է նաև առաջին անհրաժեշտության ապրանքների գների հետ կապված: Թանկացել է հացաբուլկեղենն ու ձավարեղենը (1.7 %), հացը՝ 2,2 %, կարագը, մրգերն ու բանջարեղենը՝ երկնիշ (ցուցանիշները տե՛ս նկարում): Բավական հետաքրքիր է, որ վարսավիրական ծառայությունների գները թանկացել են 13.8 տոկոսով, և գների կտրուկ աճ՝ 6.9 տոկոսանոց, գրանցվել է հունվարին՝ դեկտեմբերի համեմատ, ոլորտի հարկման քաղաքականությանը զուգահեռ:
Օբյեկտիվության համար նշենք, որ թանկացումների պատճառների թվում նաև արտաքին գնաճային ճնշումները կան, սակայն, օրինակ նույն վարսավիրական ծառայությունների գնաճի դեպքում, հարց է առաջանում՝ արդյոք թանկացումները հարկային վարչարարության հետևանք չեն:
Հիմա եթերում
