Հայկական Սինգապուր. «Մեծ ռեպորտաժ» Թամարա Հովհաննիսյանի հետ
21 Նոյեմբերի 2024, 22:00
Ի՞նչ են անում հայերը, երբ նոր վայր են տեղափոխվում: Նրանք եկեղեցի են կառուցում:
Alpha News-ի «Մեծ ռեպորտաժ» շարքը ներկայացնում է հարցազրույց Սինգապուրի հայկական եկեղեցու կամավոր Պավել Կարապետյանի հետ, ով պատմել է, թե ինչպես և երբ է կառուցվել Սինգապուրի Սուրբ Գրիգոր Լուսավորիչ եկեղեցին:
«Շենքը հիմնադրվել է 1835 թվականին, օծվել է 1836 թվականի մարտի 26-ին: Ընդհանրապես հայերը Սինգապուր են ժամանել 1819 թվականից սկսած։ Պատմական փաստերը ցույց են տալիս, որ այդ ժամանակվանից այստեղ արդեն հիմնվել են հայկական առևտրային ընկերություններ։ Մի քանի ընտանիք տեղափոխվել է Սինգապուր, և նրանք որոշել են, որ Սինգապուրն իրենց համար երկրորդ տուն կդառնա։ Մեր գեներում արդեն նստած է. ի՞նչ են անում հայերը, երբ նոր վայր են տեղափոխվում: Նրանք եկեղեցի են կառուցում», — ասել է Alpha News-ի զրուցակիցը։
Այդ ժամանակ Սինգապուրը բրիտանական գաղութ էր, և հայերը թագուհուն խնդրել են իրենց նվիրել այն հողը, որի վրա էլ կառուցվել է եկեղեցին: Պավել Կարապետյանը նշել է նաև, որ շենքը գտնվում է Սինգապուրի «սրտում», և այս պահին այն Սինգապուրի ամենահին եկեղեցին է և ամենահին շենքը, որը ճարտարապետական առումով չի փոխվել: Նա ծանոթացրել է եկեղեցու հարևանությամբ վերջերս կառուցված հայկական պատկերասրահի ցուցադրությանը, ինչպես նաև ներկայացրել է Սինգապուրի հայկական փողոցը:
Հիմա եթերում
