Կենտրոնական բանկն անկեղծ է իր մեսիջներում
21 Մարտի 2025, 19:25
ՀՀ Կենտրոնական բանկը վերաֆիանանսավորման տոկոսադրույքը թողեց անփոփոխ՝ 6,75 %: Այն, որ տոկոսադրույքը նույնը թողնելու սցենարը հավանական էր, խոսել ենք նախկինում: Մյուս կողմից նման որոշման պատճառ հանդիսացել են բազմաթիվ անորոշությունները։ Այդ անորոշությունների և այլ մեսիջների մասին հղեց ԿԲ խորհուրդը՝ լրագրողների հետ հանդիպման շրջանակներում:
Եթե փորձենք անդրադառնալ մեսիջներին, ապա նշվեց հիմնական գործընկեր երկրներում գնաճային դրսևորումների պահպանման մասին, ինչպես նաև առևտրային լարվածության՝ համաշխարհային մակարդակում: Սրանցով պայմանավորված Հայաստանի վրա արդեն իսկ կան արտաքին թույլ գնաճային ճնշումներ:
Գնաճի հետ կապված, ԿԲ-ում գնահատում են ներկայիս թանկացումներն ավելի շատ սեզոնայնությամբ պայմանավորված և ոչ՝ պահանջարկով: Գուցե այսօր իսկապես սեզոնայնությունն էական ազդեցություն ունի, սակայն նույն համաշխարհային տնտեսությունից արտաքին ազդակների մասով անորոշություններն իրավունք են տալիս չբացառելու, որ գնաճը մեզ մոտ կշարունակվի:
Խոսվեց տնտեսության աճի մասին, որ առավելապես պայմանավորված է ժամանակավոր գործոններով: Սա հետագա աճի տեսանկյունից խնդիրներ ունի: Ի դեպ, չբացառվեց անցանկալի սցենարի զարգացման հավանականությունը, որով պահանջարկի նվազում կլինի: Եթե ավելի պարզ ու մատչելի, ներկայիս տնտեսական աշխուժությունը կկրճատվի և մարդկանց գնողունակությունը՝ ևս:
Այս հանգամանքով պայմանավորված, հնարավոր է վարկերի տոկոսների նվազում:
Հիմա եթերում
