Սերգեյ Նասիբյանը հոգեբանության, Հնդկաստան ճանապարհորդության, միշտ ստող այցելուների և հոգու մասին. «Էթնիկ կոդ»

Ի՞նչն է օգնում մեզ՝ հայերիս, որտեղ էլ որ ապրենք, սիրված և պահանջված լինել, հասնել հաջողության, պահպանել ազգային ու ընտանեկան արժեքները։

Alpha News-ի «Էթնիկ կոդ»-ի հերթական թողարկման հերոսը հոգեբան, հոգեթերապևտ, քոուչ,  հետազոտող Սերգեյ Նասիբյանն է։

Հոգեբանությունը հոգու գիտությունն է, և բոլորի հոգին պլյուս-մինուս նույնն է, և այն հավասարապես տառապում է՝ անկախ հավատքից, կրթությունից կամ հասարակության մեջ ունեցած դիրքից: Շատ մարդիկ կարողացել են իրենց տաղանդի և ուժերի հաշվին գումար վաստակել, ինչ-որ իշխանության հասնել, բայց արդյունքում բախվել են այն փաստի հետ, որ իրենց բավարարված, երջանիկ կամ կատարյալ չեն զգացել: 

«Այցելուները միշտ ստում են, սա առանցքային հասկացություն է ցանկացած հոգեբանի մոտ։  Ինչո՞ւ։ Որովհետև դուք գնում եք հոգեբանի մոտ և պատրաստվում եք ինչ-որ բանի մասին խոսել, բայց կխոսեք ամեն ինչի մասին, բացի իրականությունից: Քանի որ այսպես է աշխատում մեր միտքը, այն փորձում է շրջանցել բուժման այս բոլոր տարբերակները, և, հետևաբար, կարևոր է ոչ թե այն, ինչ ասում է այցելուն, այլ այն, ինչ նա չի ասում, կամ երբ նա պատահաբար ինչ-որ բան է ասում: Իհարկե, հոգեբանին և հոգեթերապևտին այցելելուց հետո կարող է ինչ-որ ժամանակ ավելի վատ լինել»,- ընդգծել է Սերգեյ Նասիբյանը։

Նրա խոսքով, երբ հոգեթերապևտը բացահայտում է այցելուի ցավի պատճառը, նա, ըստ էության, փորում է հիվանդ ատամը և, իհարկե, որոշ ժամանակ բավականին ցավոտ կլինի, բայց հետո վնասվածքը սկսում է ինտեգրվել գիտակցության, անձի մեջ, և շուտով մարդն իրեն ավելի լավ է զգում:

«Երբ մարդն իր կյանքով  չի ապրում, նա հսկայական խնդիրներ է ունենում՝ սկսած առողջական, վերջացրած փողի և աշխարհի, ամեն ինչի հետ կապված խնդիրներով։ Ես անընդհատ խնդիրներ ունեի բոլոր ճակատներում, ես անընդհատ ապրում էի որոշ խնդիրներ լուծելով, և ինչ-որ պահի, ըստ երևույթին, հոգնեցի: 

Ես պատմում էի այն մասին, թե ինչպես տեսա մի լուսանկար, որն իմ դասընկերը տեղադրել էր համացանցում։ Այդ լուսանկարում ես 15 տարեկան էի, հենց այն ժամանակ, երբ հեռացա Բաքվից։ Եվ այդ լուսանկարից ես հասկացա, որ 33 տարեկանում ես այլևս կապ չունեմ այն տղայի հետ, ով 15 տարեկանում նայեց այս աշխարհին և հավատում էր, որ ամեն ինչ իր ոտքերի տակ է: Այդ ժամանակ հասկացա, որ այսպես շարունակվել չի կարող, հավաքեցի իրերս ու գնացի Հնդկաստան»,- ասել է հոգեբանը։

Ինչպես նշել է Սերգեյ Նասիբյանը, երջանկությունն այն է, երբ հոգեպես այնքան առողջ ես, որ ինքդ քեզ չվնասես։ Գիտականորեն ասած, սա այն վիճակն է, երբ իրականացվում են երեք հիմնական անձնական կարիքներ՝ ազատություն, սեր և զարգացում:  Երբ այդ բաղադրիչները կան, մարդը երջանիկ է։