Շահումով խաղերին ներգրավվածության աճն անհանգստացնող է
07 Մարտի 2025, 19:15
Ազգային ժողովն ամբողջությամբ ընդունել է շահումով խաղերի տուրքը կրկնապատկելու օրինագիծը։ Այն ուժի մեջ է մտնելու այս տարվա ապրիլի 1-ից։
Այն, որ ոլորտն ունի ուշադրության կարիք, աներկբա է, ինչի մասին վկայում են նաև ոլորտի արագ աճող տեմպերը:
Մասնավորապես, 2024թ-ին նախորդ տարվա համեմատ աճը կազմել է 11,6%: Ծառայությունների ծավալում մասնաբաժինը՝ 7.9 %: Նախորդ տարվա համեմատ նվազել են խաղատների գործունեության ծավալները, մինչդեռ ավելի արագ ավելացել՝ օնլայն խաղերինը:
Մեկ այլ մտահոգիչ վիճակագրություն՝ իրականացված խաղադրույքների վերաբերյալ:
2024թ-ին խաղադրույքների ընդհանուր ծավալը գերազանցել է 7 տրիլիոն դրամը: Իհարկե այս ցուցանիշը լրացուցիչ ֆիլտրերի կարիք ունի, սակայն 2023թ-ի 6,3 տրիլիոն դրամի հետ համեմատած ակնհայտ է, որ աճ է գրանցվել:
Անդրադառնալով իրականացվող գործողությանն՝ արդյոք հարկային բեռի ավելացումը կարող է նպաստել խնդրի լուծմանը, այն է՝ հանրությանն ազարտային խաղերից հնարավորինս զերծ պահելուն, ապա պետք է նշել, որ հավանականությունը քիչ է. հարկային բեռի ավելացման արդյունքում պայմանները կվատթարանան այդ ծառայություններից օգտվողների համար, մինչդեռ միջազգային փորձը վկայում է, որ հարկային բեռի ավելացման արդյունքում ձևավորած լրացուցիչ եկամուտներն ուղղվում են սոցիալ-հոգեբանական աջակցության տրամադրմանը: Այսինքն՝ այդ քայլն ինքնանպատակ չպիտի լինի:
Միջազգային փորձը նաև խնդրի լուծման գործողությունների կոմպլեքս է առաջադրում՝ պետական մոնոպոլիա ոլորտում, խաղային ժամանակի կամ խաղադրույքների սահմանաչափերի հնարավորություն, հարազատի կողմից իր մտերիմի ներգրավվածության սահմանափակման հնարավորություն և այլն:
Ուստի, ելնելով խնդրի կարևորությունից, իրականացվող գործողությունները չպետք է կրեն իմիտացիոն բնույթ:
Հիմա եթերում
