Տնտեսության ակտիվությունը շարունակում է կառուցվածքային խնդիրներ ունենալ
02 Մարտի 2026, 17:50
2026 թվականի հունվարն ամփոփում ենք տնտեսական ակտիվության շարունակական բարձր աճով․ ցուցանիշը կազմել է 7,6%: Միևնույն ժամանակ, դեկտեմբերի համեմատ գրանցվել է կտրուկ անկում։ Ինչո՞վ է սա պայմանավորված:
2025թ-ի դեկտեմբերի համեմատ անկումը (-48,3%) պայմանավորված է, մի կողմից՝ դեկտեմբերի բարձր ակտիվության բազային էֆեկտով, մյուս կողմից՝ տարեսկզբի պասիվ ժամանակաշրջանով: Այս իմաստով հունվարի անկումը դեկտեմբերի համեմատ օրինաչափ է:
Ինչ վերաբերում է հունվարի բարձր ակտիվությանն, ապա ուշադրության է արժանի այն հանգամանքը, որ հունվարին ևս, ինչպես և նախորդ ժամանակաշրջանում, տնտեսական ակտիվության աճի կառուցվածքում առաջատար ուղղությունը շարունակում է մնալ շինարարությունը: Այս իմաստով հունվարին նախորդ ժամանակաշրջանի իներցիան պահպանվում է։
Ուշագրավ է արդյունաբերության աճը՝ 10,6%, որը կրում է որոշակի բազային էֆեկտ։ Հիշեցնենք՝ նախորդ տարվա հունվարին արդյունաբերությունն անկումային էր, այսինքն՝ կրկին կա բազային էֆեկտը: Բայց մյուս կողմից, արդյունաբերության որոշակի վերականգնումը նկատվեց 2025թ-ի երկրորդ կեսից, հատկապես տարեվերջին ամիսներին, ինչին նպաստեց վերաարտահանման ակտիվացումը։ Հավանաբար այդ զարգացումները պահպանվել են նաև հունվարին։
2026 թվականի հունվարին 2025թ-ի հունվարի համեմատ որոշակիորեն դանդաղել է արտաքին առևտրի անկումը։ Արդյոք արտաքին առևտուրն է վերականգնվել։ Պետք է նշել, որ վերաարտահանման կրկին ակտիվացումն ազդեցություն է ունեցել արտաքին առևտրի վիճակագրության վերականգնման վրա:
Ինչպես տեսանելի է, տնտեսության աճի փոփոխություն չկա, իսկ դրա հիմնական խնդիրներից մեկը ներառական չլինելն է։ Այդ պատճառով էլ բնակչության կենսամակարդակի աճը համարժեք չէ տնտեսական ակտիվության ցուցանիշներին։ Ինչ վերաբերում է վերջին օրերին իշխանության սոցիալական քաղաքականության ակտիվացմանը, ապա դա միայն պայմանավորված է նախընտրական ժամանակարշրջանով։
Հիմա եթերում
