ՌԴ նախագահը շնորհավորել է 100-ամյակը նշող հայ վետերանին
23 Փետրվարի 2024, 16:00
![](https://media.alphanews.am/wp-content/uploads/2024/02/22170925/photo_5384099465746569528_x.jpg)
Հայրենական մեծ պատերազմի մասնակից, Նովոչերկասկ քաղաքի բնակիչ Վարդան Խարագյոզյանը փետրվարի 20-ին դարձել է 100 տարեկան: Վետերանին շնորհավորել է Ռուսաստանի նախագահ Վլադիմիր Պուտինը:
Խարագյոզյանին ծննդյան օրվա առթիվ շնորհավորել են նաև քաղաքի առաջին դեմքերը, վետերանների խորհրդի ներկայացուցիչները, պատանի բանակայիններն ու զինծառայողները: Նովոչերկասկի վարչակազմի ղեկավար Յուրի Լիսենկոն վետերանին է փոխանցել Ռուսաստանի նախագահ Վլադիմիր Պուտինի և Ռոստովի նահանգապետ Վասիլի Գոլուբևի շնորհավորանքները:
Վարդան Խարագյոզյանը ծնվել է 1924թ. փետրվարի 20-ին Չալթիրում: 1943թ. զորակոչվել է բանակ: 18-ամյա Խարագյոզյանը 273-րդ գումարտակի հետ Բելայա Կալիտվայից անցել է Ստալինգրադ։ Նա երկու անգամ վիրավորվել է, բայց բուժումից հետո ամեն անգամ վերադարձել է ծառայության։ Խարագյոզյանը կռվել է Մերձբալթյան երկրներում, Լեհաստանում, հասել Գերմանիա և մասնակցել Բեռլինի փողոցային մարտերին։ Պարգևատրվել է «Կարմիր աստղ» շքանշանով, Հայրենական պատերազմի 1-ին աստիճանի շքանշանով, Իոսիֆ Ստալինի կողմից հուշամեդալներով, հոբելյանական մեդալներով և շնորհակալագրով:
Պատերազմից հետո ապրել է Նովոշախտինսկ քաղաքում։ Վարդան Խարագյոզյանը Նովոչերկասկ է տեղափոխվել 1991 թվականին, որտեղ աշխատանքի է անցել սինթետիկ արտադրանքի գործարանում և աշխատել այնտեղ գրեթե քառորդ դար՝ դառնալով ձեռնարկության վաստակավոր վետերան։