«Ռոսատոմ»-ը կարող էր երկարաձգել Հայաստանի ԱԷԿ-ի աշխատանքը, սակայն Երևանը ընտրում է «եվրոպական վեկտորը»․Օվերչուկ

«Ռոսատոմ»-ը կարող էր երկարաձգել Հայաստանում գործող ատոմակայանի շահագործման ժամկետը մինչև 2036 թվականը, սակայն Երևանը ընտրում է «եվրոպական վեկտորը»՝ նախապատվությունը տալով ոչ իրազեկ եվրոպական կապալառուներին։ Այս մասին ՏԱՍՍ-ին տված հարցազրույցում հայտարարել է Ռուսաստանի Դաշնության փոխվարչապետ Ալեքսեյ Օվերչուկը։

Նա նշել է, որ ատոմակայանը կգործի մինչև 2026 թվականի աշուն, բայց ավարտին է մոտենում դրա շահագործումը մինչև 2031 թվականը երկարաձգելու նախապատրաստումը։ «Դա կարվի։ Մեր մասնագետները նաև կարծում են, որ հնարավոր է երկարաձգել կայանի աշխատանքը մինչև 2036 թվականը, սակայն դրա համար պետք է ապահովվեն որոշակի պայմաններ», -ընդգծել է նա։

Օվերչուկի խոսքով՝ ներկայումս, Հայաստանի զարգացման եվրոպական վեկտորի շրջանակում, կայանի շահագործման ժամկետի երկարաձգման հետ կապված աշխատանքների մեծ մասը տրվում է եվրոպական կապալառուներին, որոնք սեյսմիկ վտանգավոր գոտիներում աշխատանքի փորձ չունեն և չեն ապահովում անհրաժեշտ համակարգում կայանի գլխավոր կոնստրուկտորի հետ։

Փոխվարչապետը նշել է, որ նման իրավիճակում «բոլորը պետք է մտածեն», երբ «քաղաքականապես պայմանավորված որոշումները սկսում են ազդել ատոմային էներգիայի արտադրության տեխնոլոգիաների վրա»։

Միևնույն ժամանակ, Օվերչուկը հստակեցրել է, որ մինչև 2036 թվականը կայանի անվտանգ շահագործման վերաբերյալ «Ռոսատոմ»-ի կողմից երաշխիքներ տրամադրելու անհրաժեշտ պայմանը պետական կորպորացիայի կողմից իրականացվող կապալառուական աշխատանքների մասնաբաժնի ապահովումն է՝ առնվազն 70%-ի չափով։