Ռուբեն Մաթևոսյանն այսօր դառնում է 83 տարեկան
12 Հունվարի 2024, 21:50
Alpha News-ը շարունակում է ներկայացնել «Ալֆա պերսոնա» շարքը:
Այսօր հայ երգիչ, կոմպոզիտոր, ժողովրդական երգերի կատարող, ուսուցիչ, ՀԽՍՀ ժողովրդական արտիստ Ռուբեն Մաթևոսյանը նշում է ծննդյան 83-րդ տարեդարձը։
Մաթևոսյանը ծնվել է 1941 թվականին Սպիտակ քաղաքում։ Ավարտել է Սայաթ-Նովայի անվան երաժշտական դպրոցը, սովորել նաև Երևանի պետական համալսարանի բանասիրական ֆակուլտետում՝ միաժամանակ ուսանելով կոնսերվատորիայում։
Մաթևոսյանն աշխատել է Հայաստանի ռադիոկոմիտեի ժողովրդական գործիքների անսամբլում, 1996 թվականից ղեկավարում է այն։
Նա կատարել է ժողովրդական երգեր և հայ կոմպոզիտորների ստեղծագործություններ, իսկ «Անուշ» օպերայից հայտնի Սարոյի արիաները մաեստրոյի հայտնի ստեղծագործություններից են։
Մաթևոսյանը երկար տարիներ դասավանդել է Երևանի Կոմիտասի անվան պետական կոնսերվատորիայում և Առնո Բաբաջանյանի անվան երաժշտական քոլեջում։ Ռուբեն Մաթևոսյանի ստեղծագործությունը բարձր են գնահատել այնպիսի արվեստագետներ, ինչպիսիք են Մարտիրոս Սարյանը, Արամ Խաչատուրյանը, Դմիտրի Կաբալևսկին, Լյուդմիլա Զիկինան։
Մաթևոսյանը համերգներով հանդես է եկել աշխարհի ավելի քան 60 երկրներում, երաժշտության և արվեստի վարպետ Ռուբեն Մաթևոսյանը միշտ պարուրված է եղել հանդիսատեսի սիրով և հարգանքով։
2011 թվականին Հայաստանի Հանրապետության անկախության 20-ամյակի կապակցությամբ Ռուբեն Մաթևոսյանը պարգևատրվել է Սուրբ Մեսրոպ Մաշտոց շքանշանով՝ հայ երգարվեստի զարգացման և տարածման գործում ունեցած անձնական մեծ ավանդի համար։
Հիմա եթերում
