Ռուսաստանին և Հայաստանին կտրում են Իրանից. Բոգդան Բեզպալկո

Ռուս քաղաքագետ Բոգդան Բեզպալկոն Alpha News-ի հետ զրույցում մեկնաբանել է, թե ինչ կարելի է ակնկալել Հայաստանի և Ադրբեջանի ղեկավարներ Նիկոլ Փաշինյանի և Իլհամ Ալիևի հանդիպումից ԱՄՆ նախագահ Դոնալդ Թրամփի հետ:

Փորձագետի խոսքով՝ Ռուսաստանի համար այս ամենը ոչ մի լավ բան չի նշանակում։

«Ռուսաստանին և Հայաստանին կտրում են Իրանից։ Բնական է, որ սա լրացուցիչ ճանապարհ է Թուրքիայի համար դեպի Կասպից ծով, որտեղ նա պատրաստվում է կառուցել ռազմածովային բազա կամ պարզապես ՆԱՏՕ-ի ռազմաբազա։ Ուստի մեզ համար դա ոչ մի լավ բան չի նշանակում։ Եթե այդ ամբողջ լոգիստիկայով զբաղվեն ամերիկացիները, ապա նրանք կփորձեն ներթափանցել այդ տարածք՝ ցույց տալու իրենց ներկայությունը Կասպից ծովի տարածաշրջանում և Կենտրոնական Ասիայի տարածաշրջանում, կփորձեն մի շարք էներգահոսքեր, ապրանքային հոսքեր և այլն անցկացնել այդ «Զանգեզուրի միջանցք»-ով։

Ընդհանուր առմամբ, նրանց համար կարևոր է ներթափանցել այնտեղ, որտեղ կան ածխաջրածինների շատ մեծ պաշարներ՝ դրանք վերահսկելու, ինչպես նաև այնտեղ իրականում գտնվող պետություններին վերահսկելու համար։ Եվ այս ամենն Իրանի և ամենակարևորը՝ Չինաստանի համար սպառնալիք ստեղծելու համար է։ Ահա թե ինչի համար են այդ ամենը փոխանցում ամերիկացիներին։ Թուրքիան, տվյալ դեպքում, փաստացի օպերատոր է», — ասել է Բեզպալկոն։

Քաղաքագետի կարծիքով՝ Ադրբեջանին ակնհայտորեն խոստանում են ընդլայնել ազդեցությունը տարածաշրջանում։

«Ադրբեջանն այժմ հույս ունի ավելացնել իր նշանակությունը ՆԱՏՕ-ի ռազմածովային բազաների տեղակայման, այդ միջանցքներով նավթի մատակարարման հաշվին։ Ադրբեջանին հենց դրանով են գայթակղում։ Եվ, իհարկե, ոչ պաշտոնապես նրան խոստանում են, որ ապագայում նա կընդլայնի իր ազդեցության ոլորտը, գուցե նույնիսկ տարածքային առումով։ Բայց այդ ամենը քննարկվում է փակ դռների հետևում, ոչ հրապարակային։ Ադրբեջանի ղեկավարությունը կարծում է, որ նա օգուտով դուրս կգա, և բացի այդ, դա մեծ հեղինակության հաղթանակ է նրանց համար։ Ադրբեջանը ցանկանում էր Թուրքիայի հետ ստեղծել «Զանգեզուրի միջանցքը», և նա ստեղծել է այն։ Նա հաղթել է: Նա հաղթել է Լեռնային Ղարաբաղի պատերազմում, իսկ հիմա նա ստիպել է Հայաստանին թույլ տալ իրեն կառուցել «Զանգեզուրի միջանցք» իր պայմաններով», — եզրափակել է Բեզպալկոն։