Ռուսաստանը կարող է ավելին անել Հայաստանի համար, քան ցանկացած այլ գործընկեր. Անդրեյ Կորտունով

Միջազգային գործերի ռուսական խորհրդի գիտական տնօրեն Անդրեյ Կորտունովը Alpha News-ին մեկնաբանել է ԵՄ-ի հետ Հայաստանի մերձեցումը և Ռուսաստանի հետ հետագա հարաբերությունները: Ըստ փորձագետի՝ Եվրամիությունը, իր բոլոր արժանիքներով հանդերձ, ռազմաքաղաքական միություն չէ և չի կարող հանդես գալ որպես Հայաստանի անվտանգության երաշխավոր։

«Եվրոպայի հետ իր կապերն ամրապնդելու Հայաստանի ցանկությունը հասկանալի է, արդարացված, և, հավանաբար, ոչ ոք դրան չի առարկի։ Այնուամենայնիվ, մենք պետք է հաշվի առնենք առնվազն երկու հանգամանք: Նախ, նույնիսկ ԵՄ անդամակցության թեկնածուի կարգավիճակ ստանալը չի նշանակում, որ ձևավորվում է Եվրամիությանն անդամակցելու ինչ-որ ժամանակացույց։ Մենք գիտենք, որ, ասենք, Թուրքիայի անդամակցության բանակցությունները շարունակվում են արդեն շատ տասնամյակներ, և մինչ այժմ դրանք առանձնապես առաջընթաց չեն գրանցել։ Եվ այստեղ, իհարկե, պետք չէ պատրանքներ ունենալ։

Եվ երկրորդ՝ Եվրամիությունը, իր բոլոր արժանիքներով հանդերձ, ռազմաքաղաքական կառույց չէ, այսինքն՝ չի կարող հանդես գալ որպես Հայաստանի անվտանգության երաշխավոր։ Արեւմուտքի կողմից Հայաստանի անվտանգությունը երաշխավորելու համար նրան պետք է ընդունեն Հյուսիսատլանտյան դաշինք (ՆԱՏՕ), որպեսզի նրա վրա տարածվի Հյուսիսատլանտյան պայմանագրի 5-րդ հոդվածը։

Բայց, որքան հասկանում եմ, դա չի նախատեսվում։ Կարծում եմ, որ սա հիպոթետիկ տարբերակ է, որի մասին, հավանաբար, մոտ ապագայում խոսք չի լինի։ Ուստի այստեղ, իհարկե, Հայաստանի Հանրապետության ղեկավարությունը պետք է իրատեսորեն գնահատի Եվրոպայի հնարավորությունները, հատկապես այն առումով, որ վերաբերում է Հայաստանին անվտանգության երաշխիքներ տրամադրելուն», — ասել է Կորտունովը։

Ինչ վերաբերում է Հայաստանի և Ռուսաստանի հետագա հարաբերություններին, ապա, ըստ փորձագետի, մեր երկրները կապված են ամուր կապերով ոչ միայն պետությունների, այլև հասարակության մակարդակով։

«Ես իսկապես չէի ցանկանա, որ այդ հարաբերությունները ինչ-որ քաղաքական իրավիճակի զոհ դառնան։ Եվ ես կարծում եմ, որ, ի վերջո, եթե Հայաստանն իր անկախությանը կամ տարածքային ամբողջականությանը պոտենցիալ վտանգ է տեսնում Թուրքիայից կամ Ադրբեջանից, ապա Ռուսաստանն այստեղ, հավանաբար, կարող է անել ավելին, քան տարածաշրջանին չպատկանող Հայաստանի ցանկացած այլ գործընկեր։ Իմ տեսանկյունից ավելի տրամաբանական կլիներ Հայաստանի անվտանգության խնդիրը լուծել առաջարկվող 3+3 ձևաչափի շրջանակներում՝ գոյություն ունեցող բոլոր սահմանափակումներով»,- եզրափակել է Կորտունովը։