Սա ժողովրդավարություն չէ. Զատուլինը՝ Հայաստանում քաղաքական հետապնդումների մասին

ՌԴ Պետդումայի ԱՊՀ հարցերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը Alpha News-ի հետ զրույցում մեկնաբանել է Հայաստանի վարչապետ Նիկոլ Փաշինյանի և Ռուսաստանի նախագահ Վլադիմիր Պուտինի մոսկովյան հանդիպումը։

Պատգամավորի կարծիքով՝ Փաշինյանն այդպես էլ չկարողացավ կասկածի տակ դնել այն վերլուծությունը, որը հանդիպման ընթացքում ներկայացրել է Ռուսաստանի նախագահը։

«Կարծում եմ՝ արժե պատշաճ գնահատել Կրեմլում աշխատող մարդկանց հումորի զգացումը, որոնք այս հանդիպումը կազմակերպել են ապրիլի 1-ին՝ Ծիծաղի օրը, և պարոն Փաշինյանին, ըստ էության, հնարավորություն են տվել ինքն իրեն բացահայտել»,- նշել է Զատուլինը։

Փորձագետի խոսքով՝ կարևոր է ուշադրություն դարձնել նաև Ռուսաստանի նախագահի այն հայտարարությանը, որ միաժամանակ լինել և՛ Եվրասիական, և՛ Եվրոպական միությունում՝ անհնար է։

«Պուտինն ընդգծեց, որ դա ձեր իրավունքն է՝ ընտրել այն միությունները, որոնցում ցանկանում եք լինել։ Սակայն միաժամանակ լինել և՛ Եվրասիական, և՛ Եվրոպական միությունում անհնար է։ Նա դա ասում է բավական հստակ և արդեն ոչ առաջին անգամ։

Ի՞նչ է պատասխանում Փաշինյանը։ Նա ասում է՝ այո, մենք հասկանում ենք, որ դա անհնար է, բայց ժամանակը դեռ չի եկել, մենք ինչ-որ ուղղությամբ շարժվում ենք, և երբ հասնենք՝ այդ ժամանակ էլ կկատարենք ընտրությունը ձեր և մյուսների միջև։ Սա ի՞նչ դիրքորոշում է պետական գործչի համար»,- ընդգծել է Կոնստանտին Զատուլինը։

Պատգամավորի կարծիքով՝ Փաշինյանն այժմ կձգտի ներկայացնել Պուտինի հետ հանդիպումը որպես հերթական հաղթանակ՝ իբր դա վկայում է, որ իրեն ընդունում են թե՛ Ռուսաստանում, թե՛ Սպիտակ տանը։

«Ներքաղաքական առաջնահերթությունների, բարքերի, ժողովրդավարության և այլ հարցերի համատեքստում ամենահետաքրքիրն այն է, որ, պարզվում է, Հայաստանից ավելի ժողովրդավարական երկիր չկա։ Սա այն դեպքում, երբ վարչապետին ամենուր ուղեկցում են բազմաթիվ անվտանգության աշխատակիցներ։ Սա այն դեպքում, երբ չորս արքեպիսկոպոս և եպիսկոպոս գտնվում են բանտում։

Այն պարագայում, երբ եկեղեցու նկատմամբ հարձակումներ են իրականացվում, որոնք խախտում են պետություն-եկեղեցի հարաբերությունների և քաղաքացու հավատքի ու պետական պարտավորությունների միջև գոյություն ունեցող բոլոր ժամանակակից նորմերը։

Պարզվում է՝ խնդիր է նաև այն, որ Հայաստանում կան երկքաղաքացիություն ունեցող մարդիկ, և նրանք իբր իրավունք չունեն փոխարինելու Փաշինյանին վարչապետի պաշտոնում։ Իսկ բանտում նստե՞լը նույնպես պարտադիր է նրանց համար միայն այն պատճառով, որ ունեն երկու անձնագիր։ Խոսքը Սամվել Կարապետյանի մասին է»,- ասել է նա։

Զատուլինի խոսքով՝ Փաշինյանն ու նրա թիմը Պուտինի խոսքի ընթացքում նստած էին բավական ընկճված վիճակում։

«Պուտինը խոսեց այն մասին, որ մեր հարաբերությունները ձևավորվել են դարերի ընթացքում։ Իսկ պարոն Փաշինյանն ու նրա թիմը դրա մասին ինչ-որ բան ասացի՞ն։ Նրանք ընդհանրապես Պուտինի խոսքի ընթացքում նստած էին բավական ընկճված վիճակում, ինչպես նաև հենց Փաշինյանը, որը նկատելիորեն լարվեց, երբ Պուտինը սկսեց խոսել ժողովրդավարության, հետապնդումների, ինչպես նաև պրոռուսական ուժերի մասին, որոնք, նրա կարծիքով, նույնպես պետք է մասնակցեն քաղաքական պայքարին, եթե սա իսկապես ժողովրդավարություն է։

Իսկ այսօր պարոն Փաշինյանն, ինչպես հայտնի է, ամեն կերպ փորձում է թույլ չտալ ընտրություններին մասնակցել նրանց, ում համարում է իր համար վտանգավոր մրցակիցներ։ Ահա ամբողջ ժողովրդավարությունը», — եզրափակել է Զատուլինը։