Սա Թրամփի անվան խորհուրդ է, այլ ոչ թե ՄԱԿ-ի այլընտրանք. Դմիտրի Տրենինը՝ «Խաղաղության խորհրդի» մասին

Տնտեսության բարձրագույն դպրոց ազգային հետազոտական համալսարանի Համաշխարհային ռազմական տնտեսության և ռազմավարության ինստիտուտի տնօրեն Դմիտրի Տրենինը Alpha News-ի հետ զրույցում անդրադարձել է ՌԴ նախագահ Վլադիմիր Պուտինի բանակցություններին ԱՄՆ նախագահի հատուկ բանագնաց Սթիվ Ուիթքոֆի հետ։

Փորձագետը խոսել է ուկրաինական հակամարտությունում նոր «Մինսկի» հավանականության, ինչպես նաև Գրենլանդիայի վերաբերյալ Դոնալդ Թրամփի հայտարարություններից հետո Ռուսաստանի և ԱՄՆ-ի հետ Եվրոպայի հարաբերությունների մասին: Նա նաև կարծիք է հայտնել Թրամփի նոր նախաձեռնության՝ «Խաղաղության խորհրդի», դրա հեռանկարների և ՄԱԿ-ին փոխարինելու հնարավորության մասին։

Ըստ փորձագետի՝ Վլադիմիր Պուտինի հանդիպումը Սթիվ Ուիթքոֆի և Ջարեդ Քուշների հետ շարունակություն է այն գործընթացի, որը սկսվել էր անցած տարի Ռուսաստանի և ԱՄՆ նախագահների հանդիպման ժամանակ Ալյասկայում:

«Սա արդեն ամիսներ շարունակվող գործընթացի շարունակությունն է։ «Իմ կարծիքով, սա Ուիթքոֆի և Քուշների յոթերորդ այցն է Մոսկվա՝ 2025 թվականից ի վեր։ Տարբեր տեղեկություններ են ստացվում այն մասին, թե որքան են առաջ շարժվել կողմերը՝ ռուսական և ամերիկյան, ուկրաինական հակամարտության կարգավորման փորձերում։

Ռուսաստանի սկզբունքային դիրքորոշումը մնում է նույնը։ Այսօր այն մեծապես հիմնված է այն պայմանավորվածությունների և քննարկումների վրա, որոնք տեղի են ունեցել օգոստոսին Ալյասկայում։ Սակայն, թե կոնկրետ ինչ է այնտեղ համաձայնեցվել և ինչի շուրջ են կողմերը եկել ընդհանուր հայտարարի, առայժմ հնարավոր չէ հստակ ասել։ Այդ տեղեկատվությունը հրապարակման կամ տարածման ենթակա չէ, ինչպես այսօր նշել է ՌԴ նախագահի մամուլի քարտուղար Պեսկովը։

Բայց, ինչպես որոշ ժամանակ առաջ հայտարարել էր Թրամփը, համաձայնության հասնելու խոչընդոտը Զելենսկին է։ Թե որքանով է Զելենսկին նահանջել իր դիրքերից, հրապարակավ դժվար է ասել։ Նա մնում է նույն իր դիրքերում ։ Այդ դիրքորոշումները համարվում են ոչ կառուցողական և թույլ չեն տալիս հասնել համաձայնության։ Աբու Դաբիում անվտանգության հարցերով ընթացող եռակողմ բանակցությունները, թեև կրում են տեխնիկական բնույթ, այնուամենայնիվ, շատ կարևոր են։ Զուգահեռաբար, որքան հասկանում եմ, տեղի են ունենալու խորհրդակցություններ Ռուսաստանի և ԱՄՆ-ի միջև տնտեսական համագործակցության հարցերով։ Իհարկե, այս ամենը փոխկապակցված է. առանց ուկրաինական ուղղությամբ հաջողությունների, հավանաբար, տնտեսական առաջընթաց չի լինի»,-հայտարարել է Տրենինը։

Ինչ վերաբերում է Դոնալդ Թրամփի նոր նախաձեռնությանը՝ «Խաղաղության խորհրդին», ապա փորձագետը գտնում է, որ այն չի դառնա այլընտրանք ՄԱԿ-ին:

«Կարծում եմ՝ սա «Թրամփի անվան» խորհուրդ է, այլ ոչ թե ՄԱԿ-ին այլընտրանք։ Դրա ապագան կախված է նրանից, թե ինչպես Թրամփը կօգտագործի այդ խորհուրդը և ինչ նկատի ունի։ Եթե այդ խորհուրդն, օրինակ, դառնա ոչ ֆորմալ ակումբ աշխարհի մի քանի ազդեցիկ պետությունների և կառավարությունների ղեկավարների համար, որոնց հետ Թրամփը կզրուցի այդ խորհրդի շրջանակում կամ երկկողմ ձևաչափով՝ դա մի հարց է։ Իսկ եթե սա բացառապես մեդիա նախագիծ է, այսինքն՝ այն ստեղծվում է որպես ՄԱԿ-ին այլընտրանք, ապա, ճիշտն ասած, նրա մոտ առայժմ այնքան էլ լավ չի ստացվում։

Եվրոպացիները, եվրոպական խոշոր երկրները, այս փուլում հրաժարվել են մասնակցել։ Իսկ այն երկրները, որոնք դադար են վերցրել, ներառյալ Ռուսաստանը, Հնդկաստանը և Չինաստանը, հավանաբար վերջնական որոշում կկայացնեն այն ժամանակ, երբ իրենց համար պարզ կդառնա, թե ինչ նկատի ունի Թրամփը և ինչպես կարող են իրենք օգտագործել այդ խորհուրդը սեփական օրակարգն առաջ մղելու համար՝ թե՛ ԱՄՆ-ի հետ հարաբերություններում, թե՛ համաշխարհային քաղաքականության մեջ։ Տեսնենք, թե ինչ կլինի։ Առայժմ այս խորհրդի ապագան լիովին անհայտ է։ Տեսնենք, թե ինչպես կաշխատեն Գազայի հարցում, եթե նրանց հաջողվի որևէ բանի հասնել»,-նշել է Տրենինը։