Լիբանանի հայ համայնքը ստորագրահավաք է անցկացրել՝ ի աջակցություն Արցախի․ տեսանյութ

Լիբանանի հայ համայնքը Պուրճ Համուտի հրապարակում, ի աջակցություն Արցախի, ստորագրահավաք, մոմավառություն և զօրակցող միջոցառում է անցկացրել։

Լիբանանահայությունը «Արցախը Հայաստան է», «Արցախը չի՛ լինելու ադրբեջանի կազմում», «Արցախը Հայաստանի անբաժան մասն է» պաստառներով ավտոերթ են անցկացրել՝ պահանջելով անհապաղ բացել Լաչինի միջանցքը և դադարեցնել արցախահայերի նկատմամբ ցեղասպան քաղաքականությունը։

Սեպտեմբեր 2-ին` Արցախի Հանրապետության անկախության հռչակման խորհրդանշական օրը, ի պաշտպանություն շրջափակված Արցախի, աշխարհի հայաշատ վայրերում Արցախի ու նրա պետականության աջակցության ու Ադրբեջանի ցեղասպան գործողությունները դատապարտող ակցիաներ, բողոքի ցույցեր են իրականացվում։

Աշխարհասփյուռ հայությունն իր ձայնն է հնչեցնում` հրավիրելով միջազգային կառույցների ու դերակատարների ուշադրությունը ստեղծված իրավիճակի վրա։

Աշխարհի 16 երկրում ակցիաներն անցկացվում  են «SOS Artsakh» խորագրով։

Սեպտեմբեր 2-ը Արցախի Հանրապետության անկախության հռչակման օրն է։ 1991 թվականի սեպտեմբերի 2-ին ժողովրդական պատգամավորների Լեռնային Ղարաբաղի մարզային եւ Շահումյանի շրջանային խորհուրդների բոլոր մակարդակների խորհուրդների պատգամավորների
մասնակցությամբ համատեղ նստաշրջանը հռչակեց Լեռնային Ղարաբաղի Հանրապետության անկախությունը։