Սևակ Խանաղյան. ձայն, որը ճանաչում են առաջին իսկ նոտայից

Սևակ Խանաղյանն արտիստ է, ում կենսագրությունը միավորում է հայկական արմատները, ռուսական բեմը և միջազգային ճանաչումը։

Երգիչը ծնվել է 1987 թ․ հուլիսի 28-ին Հայկական ԽՍՀ Մեծավան գյուղում։ Մանկուց հետաքրքրություն է ցուցաբերել երաժշտության նկատմամբ։ Հայրը կատարում էր ժողովրդական մեղեդիներ, իսկ 7 տարեկանից նա որդուն սովորեցրել է նվագել սինթեզատոր։ Սևակն ավարտել է երաժշական դպրոցի ակորդեոնի դասարանը, իսկ 2014թ-ին ընդունվել է Մոսկվայի Մայմոնիդի անվան պետական դասական ակադեմիան:

Փառքի ճանապարհը սկսվել է «Главная сцена» և «Голос» հեռուստահաղորդումներին մասնակցությամբ, սակայն բեկումնային է դարձել ուկրաինական «X-Factor» նախագիծը, որտեղ նա հաղթել է 2016 թվականին իր «Не молчи» հեղինակային երգով։ Նրա վոկալը, խորը տեքստերը և հուզական մատուցումն անմիջապես առանձնացրել են նրան մյուս կատարողներից։ 2018 թ․ նա ներկայացրել է Հայաստանը «Եվրատեսիլ» մրցույթում՝ «Քամի» երգով. մրցույթի պատմության մեջ առաջին անգամ հայկական ստեղծագործությունը հնչել է ամբողջությամբ մայրենի լեզվով։

Նրա ստեղծագործության մեջ առանձնահատուկ տեղ է գրավում «Արցախ» երգը, որը գրվել է 44-օրյա պատերազմի ժամանակ։ Երաժշտությունը գրել է Սևակը, իսկ տեքստը՝ Սոսի Խանիկյանը։ Երգը հնչել է որպես հայրենիքի հանդեպ համերաշխության և սիրո դրսևորում՝ Արցախին աջակցելու կոչով։ Ռեժիսոր Արա Ղազարյանի տեսահոլովակը տեսողականորեն ընդգծել է ուղերձի ուժը. կադրում երևում են լեռներ, մարտիկներ, հայրենի հողի խորհրդանիշերը։ Այս երգը կարևոր մաս է դարձել այդ ծանր շրջանում։

Սևակն ակտիվորեն հանդես է գալիս ազգային արժեքների պաշտպանությամբ՝ ընդգծելով, որ իր ստեղծագործությունը ոչ միայն արվեստ է, այլ նաև սկզբունքների և արժանապատվության ձայն:

Նա ամուսնացած է, ունի երկու որդի և չնայած ճանաչված լինելուն՝ չի հանրայնացնում իր անձնական կյանքը։

Խանաղյանը պարզապես երգիչ չէ, այլ իր երգերում հնչող հուզական իմաստի կրող։ Նրա արվեստը ճշմարտություն է, մխիթարանք և ուժ՝ ծնված հայրենի հողի հետ խորը կապից։