Պարտավո՛ր ենք նոր ընտանիքներ կազմել ու ապրեցնե՛լ Արցախը…
05 Սեպտեմբերի 2023, 23:17
Քոլատակը հայրական գյուղն է։ Սուրբ վանքը նրա պահապանն է մանկությունից։ Տարիներ առաջ, երբ դեռ ընտրյալ չուներ, որոշում էր կայացրել, որ իր պսակադրությունը պետք է տեղի ունենա Սուրբ Հակոբավանքում։ Արմանն է, ում որոշումն իրականություն դարձավ օրերս՝ Մարիամի հետ։
Նորապսակների սիրո պատմությունը մինչև Արցախյան 44-օրյա պատերազմն էր հյուսվել։ Ճոխ հարսանիքը Արմանի ու Մարիամի համար ցանկություն էր, բայց ոչ նպատակ։
«Կարևորը վանքում օրհնություն ստանալն էր»,- artsakhtert-ի հետ զրույցում նշում է Արմանը։
Ստեղծված իրավիճակով պայմանավորված՝ ճոխությունից հրաժարվեցին, ընտանեկան ընթրիք կազմակերպվեց։
«Որոշումը հստակ էր: Շրջափակումը չէր կարող պսակադրության չեղարկման պատճառ հանդիսանալ»,- ասում են նորապսակները։
Շրջափակման հետևանքով առաջացած վառելիքի բացակայության պատճառով Սուրբ Հակոբավանքում պսակադրություն կազմակերպելն այդքան էլ հեշտ չէր։ Դեպի վանք տանող ամբողջ բարձունքն Արմանը՝ մարտական սամբոյի Եվրոպայի չեմպիոնը, Մարիամին գրկած է բարձրացրել…
«Աննկարագրելի են զգացողությունները… ամենաապահով ու ամուր ձեռքերում էի ինձ զգում… ամենաերջանիկն էի»,-ասում է Մարիամը։
Պաշարված Արցախում ընտանեկան երջանկություն կառուցող զույգն ապագան տեսնում է միայն հայրենիքում։
«Անտեսելով բոլոր խնդիրները` պարտավոր ենք նոր ընտանիքներ կազմել ու ապրեցնել Արցախը»,-համոզված է Արմանը։
Հիմա եթերում
