«Սուրբ տեղը դատարկ չի մնում». Դենիս Դենիսովը՝ Երևանի կողմից նոր դաշնակիցներ փնտրելու մասին

Քաղաքագետ Դենիս Դենիսովը Alpha News-ի հետ զրույցում մեկնաբանել է ՀՀ ԱԳՆ ղեկավար Արարատ Միրզոյանի այն հայտարարությունը, թե Երևանը նոր դաշնակիցներ է փնտրում անվտանգության խնդիրները լուծելու համար։

Փորձագետի կարծիքով՝ ներկա աշխարհաքաղաքական պայմաններում Հայաստանը ստիպված է իր տեղը փնտրել։

«Մենք հիանալի հասկանում ենք, որ ներկա աշխարհաքաղաքական պայմաններում, ինչպես հարավկովկասյան տարածաշրջանում, այնպես էլ ավելի գլոբալ կառուցվածքում անվտանգության նոր կառուցվող կոնֆիգուրացիայի մեջ, Հայաստանը ստիպված է իր տեղը փնտրել։ Իսկ 2020 թվականից ի վեր տեղի ունեցած հակամարտությունները, որոնք հանգեցրել են Հարավային Կովկասում կոնֆիգուրացիայի համակարգային փոփոխությունների, ենթադրում են, որ նման հայտարարությունները շարունակվելու են հնչել, բացի այդ, դրանց կհետևեն իրական գործողություններ։

Մի կողմից, Հայաստանի քաղաքական վերնախավի ներկայացուցիչներն այս պահին կտրուկ հայտարարություններ են անում Ռուսաստանի վերաբերյալ, բայց, միևնույն ժամանակ, դա միանգամայն տրամաբանական է, քանի որ Հայաստանում վերջին չորս տարիների ճգնաժամի պայմաններում հասկացել են, որ նրանք չեն կարող լիովին հույս դնել ոչ Ռուսաստանի աջակցության վրա, որն ունի իր շահերը, ոչ էլ հավաքական անվտանգության կազմակերպությունների, ինչպիսին ՀԱՊԿ-ն է»,- ասել է քաղաքագետը։

Նրա խոսքով՝ եթե Հայաստանի քաղաքական վերնախավը ռուսամետ լիներ, այդ ժամանակ կարելի էր խոսել ինչ-որ հիմնավոր պնդումների մասին, սակայն, ըստ Դենիս Դենիսովի, «ներկայիս կոնֆիգուրացիայի պայմաններում Հայաստանի քաղաքական էլիտան ակնհայտորեն հակառուսական է, ուստի Հայաստանի անվտանգության ապահովման համար Ռուսաստանից լրացուցիչ ջանքեր պահանջելը մի փոքր տարօրինակ է»:

Խոսելով Ռուսաստանում նման հայտարարությունների ընկալման մասին՝ փորձագետը նշել է, որ դրանք չեն կարող մտահոգություն և հիմնավոր քննադատություն չառաջացնել Մոսկվայում:

«Հայաստանի նման հայտարարությունները մտահոգությունն են առաջացնում Մոսկվայում և, ավելին, միանգամայն հիմնավոր քննադատություն կառաջացնեն՝ ելնելով նրանից, որ Հայաստանը Ռուսաստանի Դաշնության ավանդական ռազմավարական գործընկերն է, բարեկամ պետությունը։ Հարկ է հիշել, որ Հայաստանին Ռուսաստանի Դաշնության հետ կապում է պատմական համատեքստը, ընդհանուր հիշողությունը, տնտեսական, քաղաքական կապերը: Ռուսաստանի դերը Հայաստանի համար վերջին մի քանի հարյուրամյակների ընթացքում առանցքային է եղել։

Բայց ամեն ինչ փոխվում է, իսկ Ռուսաստանի Դաշնությունը պետք է առավելագույն հավասարակշռված մոտեցում ցուցաբերի նման հայտարարությունների ու գործողությունների գնահատման հարցում։ Պետք է ելնել մեր ազգային շահերից, Հարավային Կովկասի համար մեր ռազմավարությունից և կառուցել մեր քաղաքականությունը»,- ընդգծել է քաղաքագետը։
Փորձագետի կարծիքով, Ռուսաստանն ինքն է մեծապես նպաստել, որ Հայաստանում լինի ոչ ռուսամետ քաղաքականություն։

«Կարելի է արձանագրել, որ Հայաստանում չկա ռուսամետ քաղաքական էլիտա։ Այլ բան է, որ Ռուսաստանի Դաշնությունն ինքը մեծապես նպաստել է, որպեսզի նման քաղաքական կոնֆիգուրացիա առաջանա Հայաստանում։ Նոր կոնֆիգուրացիան պահանջում է նոր քաղաքականություն»,- ասել է Դենիսովը։
Ինչ վերաբերում է նոր դաշնակիցներ գտնելու Հայաստանի նախանշած ծրագրերին, ապա, ըստ քաղաքագետի, այստեղ ամեն ինչ հիմնված է «սուրբ տեղը դատարկ չի լինում» սկզբունքի վրա։

«Մենք հասկանում ենք, որ Արևմուտքում գլոբալ դիմակայության շրջանակներում հայկական պետությունն անպայման դաշնակիցներ կունենա։ Եվ այդ դաշնակիցներն առաջին հերթին շահագրգռված կլինեն Հայաստանն օգտագործել Ռուսաստանի Դաշնության դեմ։ Սա հետխորհրդային տարածքում ամենևին էլ առաջին օրինակը չէ՝ սկսած Մերձբալթյան երկրներից, վերջացրած Ուկրաինայով։

Հետեւաբար, լարվածության նոր օջախը, Ռուսաստանի վրա ազդեցության նոր գործիքը օրհնություն կլինի Արևմուտքի, հատկապես նրա առանցքային մրցակցի՝ ԱՄՆ-ի համար։ Եվ այս առումով ներդրումները, որոնք կարող են հաջորդել Հայաստանում, կարող են շատ նշանակալից լինել և լրջորեն ազդել պետության ներսում, և ընդհանուր առմամբ Հարավային Կովկասում իրավիճակի վրա»,- եզրափակել է Դենիսովը։