Սպառնացել են փակել կամ փոխել Ոսկետափի եկեղեցու բանալիները
24 Հունվարի 2026, 14:10
Lրագրող Սյուզի Բադոյանը ֆեյսբուքյան իր էջում գրել է․ «Լարված է օրը սկսվել Վեդու համայնքի Ոսկետափ գյուղում։ Քահանային են մոտեցել-սպառնացել մարդիկ` իրավատիրոջ դիրքերից, տհաճ զրույցից հետո սպառնացել են փակել կամ փոխել Ոսկետափի եկեղեցու բանալիները։ Ու սա արել են Տեր Արտաշեսի տիրադավերին միանալու «մեկօրյա կյանք ունեցած» աղմկոտ հայտարարությունից հետո»։
Ավելի ուշ Մասյացոտնի թեմը հայտարարություն է տարածել՝ նշելով․ «Ոսկետափում շարունակվում են ճնշումները Սուրբ Սահակ–Մեսրոպ եկեղեցու հոգևոր հովիվ Տեր Արտաշես քահանա Հակոբյանի նկատմամբ։
Քիչ առաջ ահազանգ ստացվեց, որ այսօր Ոսկետափ բնակավայրի վարչական ղեկավար Նշան Հովհաննիսյանը և Սուրբ Սահակ–Մեսրոպ եկեղեցու կառուցման հովանավոր Համլետ Գորոյանն այցելել են եկեղեցի և հոգևոր հովիվ Տեր Արտաշես քահանա Հակոբյանից պահանջել են ազատել եկեղեցին։ Նրանք նաև հայտնել են, որ մեկ ժամ անց վերադառնալու են՝ եկեղեցու մուտքի դռների բանալիները փոխելու նպատակով։
Նման գործողությունները անօրինական և անթույլատրելի միջամտություն են Հայաստանյայց Առաքելական Սուրբ Եկեղեցու ներքին կյանքին և հոգևորականների ծառայությանը։
Հորդորում ենք անհապաղ դադարեցնել Սուրբ Սահակ–Մեսրոպ եկեղեցու բնականոն գործունեությանը խոչընդոտող բոլոր քայլերը և քահանայի նկատմամբ իրականացվող ճնշումները։
Միաժամանակ հայտնում ենք, որ հիշյալ եկեղեցին կառուցված է Մայր Աթոռ Սուրբ Էջմիածնին սեփականության իրավունքով պատկանող հողատարածքի վրա, և որևէ անձ կամ մարմին իրավասու չէ կամայականորեն սեփականացնել եկեղեցին կամ միջամտել եկեղեցու գործունեությանը։
Հիմա եթերում
