Ստեփանակերտի բնակչուհին շրջափակման ընթացքում պաղպաղակագործության դասընթացի է մասնակցել և կյանքի կոչել իր բիզնես ծրագիրը
20 Հունիսի 2023, 13:35
Մայրաքաղաքի բնակչուհի Շուշան Եգանյանը շրջափակման առաջին օրերից ձեռնամուխ է եղել տնային պայմաններում պաղպաղակ պատրաստելու և իրացնելու մտահղացման իրագործմանը, իսկ աստիճանաբար մեծացող պահանջարկի շնորհիվ նա կարողացավ փոքրիկ խանութ բացել և ընդլայնել ապրուստի որոշակի միջոց ապահովող գործը:
«Արցախպրես»-ի թղթակցի հետ զրույցում՝ Շուշան Եգանյանը պատմել է, որ խանութը բացելու համար հիմք ծառայեցին ինչպես պատվերների թվի աճը, այնպես էլ՝ հաճախորդների գոհունակությունը:
«Բացեցի փոքրիկ խանութ և ունեցասծս միջոցները ներդրեցի այդ գործում, որպեսզի իմ լուման ունենամ Արցախում շրջափակման հետևանքով առաջացած դժվարություններին ինչ-որ չափով դիմակայելու գործում»,- նշել է Շ․ Եգանյանը:
Նրա խոսքով՝ մտահղացումը կյանքի կոչելու ընթացքը շատ դժվարություններով է ուղեկցվել․ համապատասխան տարածք գտնելն էր դժվար, ինչպես նաև պաղպաղակի համար անհրաժեշտ մթերքն ու սպասքը: Այդ խնդիրները հաջողվել է լուծել պետական աջակցությամբ։ Այս ընթացքում հասցրել է նաև առցանց ձևաչափով մասնակցել իտալացի հրուշակագործների կողմից Պետերբուրգում կազմակերպված դասընթացներին և ձեռք բերել պաղպաղակագործի հավաստագիր։
«Պատրաստում եմ 16 տեսակի պաղպաղակ՝ բնական մրգերով, քաղցրավենիքով և հատապտուղներով։ Վերջերս այդ շարքը համալրել է նաև շաքարային դիաբետ ունեցող հաճախորդների համար պաղպաղակը, քանի որ ունեի շաքարային դիաբետով հաճախորդներ, ովքեր մտավախությամբ էին օգտվում մյուս տեսականուց»,- մանրամասնել է զրուցակիցը:
Ստեփանակերտի բնակչուհին, պաղպաղակի խանութ բացելով, նաև նպատակ ունի աշխարհին ցույց տալ, որ արցախցին երբեք չի կոտրվում և ոչինչ չի կարող խանգարել նրան՝ ապրելու և արարելու իր հայրենի հողում:
Հիմա եթերում
