«Տեսնենք, թե ուր կհասնեն Եվրոպական ճանապարհ ընտրողները»․ ՌԴ Պետդումայի փոխնախագահ
27 Փետրվարի 2025, 10:10
Ռուսաստանի Պետդումայի նախագահի տեղակալ Բորիս Չերնիշովը Հաղորդակցությունների զարգացման ազգային հետազոտական ինստիտուտի կողմից կազմակերպված Հետխորհրդային երկրների կոմունիկացիոն ռեժիմների բարեկամության վարկանիշի շնորհանդեսի շրջանակում Alpha News-ի հետ զրույցում մեկնաբանել է իրավիճակը հայ-ռուսական և ադրբեջանա-ռուսական փոխհարաբերություններում:
Պատասխանելով այն հարցին, թե ինչպես կանդրադառնա Ռուսաստանի և ԱՄՆ-ի միջև բանակցային գործընթացը հետխորհրդային երկրների վրա, նա նշել է, որ ամենակարևորը երկու երկրների ԱԳՆ աշխատանքն է, ինչպես նաև հումանիտար և տնտեսական կապերի մակարդակը:
«Եկեք դա որոշեն Ռուսաստանի Դաշնության նախագահն ու ԱԳՆ ղեկավարը, որը պատասխանատու է դրա համար։ Մենք տեսնում ենք այն գործընթացները, որոնք այժմ տեղի են ունենում հայ-ռուսական հարաբերություններում։ Ո՞ւր են դրանք տանում: Կարծում եմ՝ մի կողմից այստեղ ամենակարևորը մեր արտաքին քաղաքական գերատեսչությունների աշխատանքն է։ Մյուս կողմից, իհարկե, հումանիտար և տնտեսական կապերի մակարդակն է։ Մենք կամրապնդենք այն և հույս ունենք, որ հարաբերությունները նույնպես կամրապնդվեն», — ասել է Չերնիշովը։
Խոսելով Հայաստանի խորհրդարանի գործընկերների հետ հարաբերությունների, ինչպես նաև նրանց հետ համագործակցության արդյունավետության մասին՝ քաղաքական գործիչը նշել է, որ շատերի հետ «անձնական հրաշալի հարաբերություններ ունի»:
«Մենք ուղիղ քննարկում ենք մի շարք սուր հարցեր, և դա լավ է։ Կան մարդիկ, որոնք իրենց համար ընտրել են եվրոպական ուղին։ Դե, տեսնենք, թե ուր նրանք կհասնեն», — նշել է նա։
Չերնիշովն անդրադարձել է նաև Բաքվում «Ռուսական տան» և «Սպուտնիկ Ադրբեջան» գործակալության փակմանը:
Հարցին, թե ուր կարող են տանել այդ քայլերը, նա նշել է.
«Ես վստահ եմ, որ արտաքին քաղաքականության հարթակում շփումներ են ընթանում թե Դումայի հանձնաժողվների, թե Արտաքին գործերի նախարարության շրջանակներում։ Տեսնենք, թե այս ամենը ուր կտանի»։
Հիմա եթերում
